Francis Nyaruri

Francis Kainda Nyaruri nigo arenge omoriki o Weekly Citizen. Erieta riaye ria okorika nigo riare Mongare Mokua. Enka ya Nyaruri nigo yarenge ange na omochie o Nyamira. Francis Nyaruri konyora okorire obotuki na korika amangana amange igoro yo omkoa o Nyanza. Amangana amange konyora arikire nigo arenge igoro ya amaaki, amo na abakori emeremo ase eserikali koria chibesa chia Abananchi. Nigo anyoretwe ime ya orosana rwa Kodera oitire chitariki 29, chia Omotienyi omotangani omwaka oyo. Nigo ekororekana inga nigo achandetwe sana konyora ataraitwa. Obotuki bwa ogoitwa kwa Nyaruri nigo bwansete Omotienyi o kabere. korwa erio,abanto babere imbabwatetwe: omonyataksi amo na omomura bwe ekeombe gia Sungusungu. Ekiabete inga omonyataksi nigo abwatetwe ore ne esimi ya Francis Nyaruri. Omonyataksi oyio nigo asuboretwe. Ekina kia omomura o Sungunsungu nigo gekageire kogambwa omotienyi o gocha.

Abatuki babere be serikali barenge korigereria amangana aya nigo batamete na kwebisa. Ekiabete inga nigo banyorete amangana inga ingoitwa bare. Omowakili bwo omochie o Nyaruri, omosike Andrew Mandi nere otomeirwe amangana inga goika atige ekina eke goisa nabo arabaisa goitwa. Omosigari omotuki bwa amangana aya, Robert Natwoli nere otebigwe atige obotuki obo ataraitwa. Onde bwensi otagete koboria igoro ya Francis Nyaruri nigo akoonywa inga ingoitwa are. Obosoku sana ase ogotachera amachiko ye ense yaito inse. Naende, nigo ere bobe sana ase ogotarorera eamate na omochie o Francis Nyaruri amabera.

Ase Omotienyo o Gatato omwaka oyo, ekeombe kia The Committee to Protect Journalists nigo kiarigete rirube gochia ase Omorai Bwe Ense, Mhe. Mwai Kibaki. Nigo giasororete Mhe. Kibaki arigererie amangana ya ogoitwa kwa abariki ba amangaseti. Naende imbaboretie arore inga obotuki bwo ogoitwa kwa Nyaruri kwabeire. Kende tikiana koba. Ase bono iga, ekeombe eke kia The Committee to Protect Journalists kiarikire rirube gochia ase Mhe. PM Raila Odinga. Nigo gekoboria PM Raila arigererie na korora inga bari bakorete amabe ase omosike Francis Nyaruri bagambigwe kobwatekana na amachiko aito Kenya. Nigo twensi togosaba omochie o Francis Nyaruri ororerwe amabera.