Nigo are emiaka 30 yoka. Nigo aroche abaamate barenge abasani bagoansa kwomana. Abairi bagoansa goetana. Ebitina bikarora. Nigo agendete impaka ase Ekoti enene ya Kenya ase okorigia ekeene erinde abaamate tibaitana. Oyo ningo? Oyo nere Job Nyasimi Momanyi. Omowakili ase Nchogu, Omwanza & Nyasimi Advocates. Oyomo bwa abasae abake barache gokonya ense yaito (Imwarora buna abasae abake ba Nyangarora Banana Youth Group barosa koganya bakorerwe ebinto na abajumbe. Bakeerigeria egasi boka. Naende nigo bagendererete buya) Omosike Momanyi okorire egento abande barakore ase chindoto chioka. Otari kwoboa. Otari kwemotia. Ekero Abagirango Rogoro babutoranetwe Omotienyi o Kabere, omwaka oyo, edistrikti enyia ya Borabu North iyatongetwe korwa ase Nyamira. Gekaba inga omoDC nigo agocha gotomwa gochia omochie o Nyamusi aaria Ekerenyo Divisioni. Omogoko bwa abaminto aaria Nyamusi nigo obete omoke. Eserikali naende egatoma rirube goteba inga Omochie bwe omoDC nigo ogochia kobera aaria ase omochie bwe Ekerenyo. Riberera nigo riamentekanete.Eriomana rikamenta. Ebuse ekaimoka. Amangana akariegwa. Ogoitana na obobisi bokaba gati ya abaamate ba Borabu, Ekerenyo na Nyamusi. Chisegi buna echi tari Bogirango rogoro oka chiabete. Nao chire ase "chidistrikti" chinyinge ase ense yaito ya Kenya. Ekero omowakili Job Momanyi arora iga, nario achiete ase Ekoti enene ya Kenya na abamwabo, Omorandia Titus Okoda na Peter Nyamoti. Bakabwa ekina ase Ekoti enene ya Kenya. Omojaji Daniel Musinga bwe Ekoti enene agateba inga chidistrikti 210 tichiri echi ekeene. Bono nonya Ekoti yakanete inga chidistriki echio nigo chiatongetwe ase mamincha ya amachiko a Kenya, bado nao chire. AbaDC bado nao bare. Bakona koria chibesa chia Abananchi bosa. Bagokora egasi ya Abachifu. Rakini bakorokwa abaDC. Omowaziri bwa amachiko Kenya, Mhe. Mutula Kilonzo, nigo agoteba inga omojaji Musinga tatebeti kende keene ase richiko. Inga ebinto Omojaji Musinga atebete nigo bire amaoni tu. Mhe. Kilonzo nigo aroche inga Bakenya tibamanyeti gosoma. Tibamanyeti amachiko. Omonene bwa amachiko, Mhe. Amos Wako rende? Mhe. Wako tari na acha ya amachiko a Kenya. Ere gicha arendire buya. Agoakanwa ebesa buya na Abananchi ba Kenya. Tari gokumia. Mhe. Amos Wako nigo airete eira inga ere tagosoera onde okobuna amachiko a Kenya, gicha akona koragera na gwesoka buya. Tiga kona koboria Mhe. Wako amangana. Kera omokenya erende kobwaye. Aaya onsi taratanga omosike Momanyi kogenderera korigia ekeene. Emepango nere aroro ase bunge yo ogotanga chibesa gochia ase abaDC ne chidistrikti echi. Ase boigo, Job Momanyi nigo aboririe ekoti esibe Omoriki bwo Oborendi, PS Francis kimemia amo na Omoriki bwe chibesa, PS Joseph Kinywa. Nigo atagete bairwe echera na gosibwa ekiagera bangire kobekera amachiko a Kenya chinguru. Nigo tokwegena inga Ababunge ne serikali imbabwatie amachiko aito. Intwe nigo togosaba amaya ase omosike Job Nyasimi Momanyi ase egasi engiya.Omosike Job Momanyi. Imbuya mono ase ogotoigora amaiso. Omobwekano omuya sana ase abasae ba kenya.
Recent Comments