Obosie

Gusii yaito

Gusii inkoegwa tore amawaidha buna Robert Nyasato akoripotia . Bono kiabeire inga obokongu imbore aroro bwe endagera. Abasomwa ba sayansi amo na abanyamitambo ingototebia bare inga endagera teri kwama buya Gusii buna yakamire amatuko aetire. Ninki? nigo bagoteba inga embura yakeire. Nonya nigo,embura temanyereiri inga nindi egotwa. Riri ekageire inga ingotwa ere, teri gotwa. Naende ekero yaansire gotwa, embura teri gotwa eisaine.

Bono, ase engencho embura yakeire, Gusii nigo yabwate oboremerwa bwe ebituma chigunia 30,000 omwaka oyo oera. Ekero embura etwete buya, Gusii nigo ekwamia ebituma chigunia 700,000 kera omwaka. Gusii nigo eetanetie chidistrikti chinde chionsi ase Nyanza ase okwamia ebituma. Nonya na Abagere nigo bagocha Gusii gotonda. Barenta ebara. Twabaa emetoriro ye ebituma.

Ase engencho endagera ekwama buya sana kobwa ande onsi, Gusii nigo ekorokwa Ekiage kia Nyanza. Tari igo rioka. Gusii nero ekwamia chinyeni chinyinge chikoonigwa ase emechi emenene ya Kenya. Rinagu? Gusii. Amandegere? Gusii. Risosa, chinsaga, rikuneni, ekabichi, egesare, amatoke, enderema, ebisukari,chingende,amanyabwari........? Gusii.  

Tari obokongu bwe embura yoka bwagerire endagera etari kwama buya Gusii. Abanyamitambo abwo nigo bagoteba inga riberera riamentekanire ase ense. Nigo bagoteba inga ase engencho riberera riamentekanire, endagera teri kwama. Egento inche kegonsinya inkeri inga timanyeti ekerengo kie riberera gie ense. Ase omobwekano, riberera ria mwanyabanto nigo rire 98.6F.

Ekerengo kie riberera rie ense inkereki? Nigo kere ekemo? Onye riberera rikomentekana, ninki gekogera ase ande are akendu na ase ande akaba riberera? Abanyamitambo totebie. Gose bono ense nigo yasukire gochia ange ne risase ase ebidigrii ebike. Obe eraisa gosuka ake korwa ase risase, obokendu tibokomentekana? Abasomwa totebie.

Onye riberera riamentekanire Gusii, baminto totebie toiranie emitambo maega obokendu boiche ake nario endagera erame. Tari igo rioka, nigo bagototebia inga goika totige gosimeka ebituma. Inga yaani tosimeke amanyabwari, chinchugu, na bimeri binde bitatageti embura enyinge. Yaani nigo batagete totige koria obosie. Inche nigo indoche inga ne esegi batagete.

Aya amwabo aya:

Aye No Omogusii Onye......

Omogusii Tari Kweba

Ebinnto Ikomi Na Kemo Bigokwoorokia Inga Aye Tori Inka Gusii