Gusii

Mhe. Amos Wako, "Amerika Genda Gochia Aaria"

Mhe. Amos Wako osiekeirwe isiko. Amerika yakanire inga Omonene Bwa Amachiko a Kenya tatacha Amerika. Ase ki? Kiabeire inga tari gokora gasi ya okorenda amachiko a Kenya na korenda Abananchi. Ekero Mhe. Amos Wako aigwa igo, nigo aimoka ogenda  impaka o Charles Njonjo. Nigo agenda kwoyia esuti yo omogaka Njonjo ekiagera eyaye konyora terainagwa korwa Amerika ase yachiete gosibigwa. Momanyete abanene ba amachiko Kenya nigo bakobeka esuti eyemo. Ebwate chinchwara. Erio ne richiko Abangeresa baetetie. Nigo Mhe. Wako aminyoka na amagoro impaka aaria ase Embasi Ya Amerika na koa Omotenenri bwa Amerika ime ya Kenya, riuko rikobwatia:

1.Abakenya nigo banganchete. Nigo bakongakana Ksh. 1.7 millioni kera omotienyi. Igo bado tibaramenta chialawensi. Inwe timwancheti omonene bwa amachiko aino. Nigo mogoakana Eric Holder chifudi sitampu chioka.
2.Inwe nigo mobwate chistate 50 chioka. Timwanya komenta kende gesa mobeka Hawaii omwaka 1959! Chingaki chiachenchirie. Menta chistate. Intwe Kenya nigo tobwate chikonstituensi 210. Naende intomente echinde.
3.Nimbwate abakori emeremo ba nyomba bonsi bare AbaKenya. Abakori emeremo ba Eric Holder nigo barwete Mexico.
4.Ira chisuti chiano gochia aaria. Nabo inkogora chisuti amo ne chianga  chiane korwa Zimbabwe gose Sudan. Chinse chingiya chianchete Abananchi babo. AmeriKa genda gochia aaria.
5.Kenya nigo ebwate omorembe. Teri gosoera onde ase ekoti ekero amachiko abunirwe. Okwo no ogosaria chinsa ne chibesa chia Abananchi. Rakini inwe Amerika, ebina botuko na mogaso. Nigo mogosoera impaka nonya ne presidenti. Imbato ki aba more? Timorochi inga echio ne chibesa chia Abananchi mogotuguta? Imosigete e presidenti yaino?
6.Kenya nigo ebwate chiministri 42. Amerika nigo ebwate 15 chioka. Tiga gotoigwera endamwamu. Kina. Menta chiministri.
7.Kende tikeiyo morankorere. Kwaheri.

Abateri Ba Yeso, Kenya

Abaminto, ewikendi engiya. Tiga omorembe o Nyasae obe ase kera oyomo. Nigo togokina kera rituko. Titomanyeti kende. Chisokoro. Ebisio na amabera a Nyasae ase kera oyomo. Tiga Kenya egenderere. Imbuya mono.

Naende abateri bande ba Yeso abwo.

Mhe. Pius Namachanja

  Mhe. Pius Namachanja, Omoteneneri o Kenya, Brazil

Omoteneneri o Kenya aaria Brazil, osirie. Mhe. Pius Namachanja nigo aaka inse na gosira. Nabo e Standard yatebire . Nigo kiaba inga Mhe. Namachanja nigo atwara entemi embe. Nigo eripoti yateba inga Mhe. Namachanja nigo asira ekero barenge amo na abaofisa bande 26 ase ensemo ya Uberaba, Brazil. Nigo barenge abwo Uberaba ase okorora amagenderero ye oboremi bwe chiombe. Komenta na obotugi bwe chinsana, Brazil nebwate obotugi bwe chiombe obonge sana. Nigo kiaba inga ekero agwa inse, nigo airwa amo na eambulensi impaka enyagitari ya Federal University ya Triangulo Mineiro. Tachieti gokonywa. Nigo abanyagitari bateba inga nigo konyora asirire ekero aika nyagitari. Nigo kiaba inga osirire chinsa ikomi na eyemo na enusu chia morogoba. Ase omochie o Mhe. Namachanja, pole sana. Gaki tiga amabera a Nyasae abe nainwe.

Priscilla Nyanduko nigo are Omoriki Omogeni ase Gusii.com

Ebirero Bio Obwanchani

Andrew Moeche Omwenga. Ekoti Enene Ya Kenya, Nakuru

Nigo barasetwe ase omochakano bwo omwaka o 2008. Ekina gekaira ange emiaka ebere. Bono ekegambero ingiateba ogochika. Ekina kia ogokwa kwa omojumbe o Ainamoi Mhe. David Too na omosigari Eunice Chepkwony inkiaera rero. Ekoti Enene Ya Kenya aaria Nakuru nigo yanyora Andrew Moeche Omwenga na amagoso yo oboiti. Andrew Moeche nigo akumerwa emiaka 10 ase egesibo ime. Abasoeri nigo batagete Andrew Moeche akumerwe ase ogokwa. Omojaji bwe ekina ekio, omosike David Maraga nigo ateba inga Moeche nigo akorete amangana ayio ase engecho yo obororo bwo obwanchani. Ase okoinyora,Omojumbe o Ainamoi, marehemu mhe. David Kimutai Too amo na omosigari Eunice Chepkwony nigo barasetwe ase omochakano bwo omwaka o 2008 aaria Eldoret.Nigo kiabete inga omosigari onde, Andrew Moeche Omwenga  nere obarasete. Omojaji nigo ateba inga Moeche nigo akorete oboiti obwo ase engencho atagete kwerenda. Goetera ase omowakili oye, Andrew Moeche nigo atebetie ekoti inga Eunice Chepkwony nere otagete komorasa ritangani. Rakini ere akabarasa bonsi ase obwango. Nonya nabo igo, omojaji nigo arusia Moeche amagoso ase okobwatia Mhe. Too na omongina Chepkwony korwa maega. Omojaji nigo ateba inga nanga nigo abarasete amaboko gose amagoro. Nigo egotebekana inga nigo abamaheremu barasetwe ase ebikuba na emetwe.

Omojaji Maraga nigo ateba inga omosubati Chepkwony na omosike Moeche nigo baumeranete ritangani aaria ase esukuru ya abapolisi, Kiganjo ase omwaka 2000. Omojaji nigo ateba inga nigo babete abanchwa. Bagatebania inga imbanywomane. Ekero bakora esukuru abwo Kiganjo, kera omonto akagenda kobwaye. Tibachieti koumerana naende impaka omwaka o 2006. Omwaka oyio o 2006, bagatomwa gokora egasi amo. Chepkwony agateba inga konyora onywomirwe. Moeche nere agateba inga konyora onywomire. Omorero bwo obwanchani ogaansa gwoka naende. Omogaka o Chepkwony agakwa ase omwaka o 2007. Basi abwo bono nario ribaga riatogete ria Andrew Moeche gotaka konywoma Eunice Chepkwony. Ase omwaka oyio, Andrew nigo airete Eunice aaria inka Nyamira erinde baumerane na abaibori baye. Abaibori bagancherana inga Eunice tiga abe omokungu o kabere. Abe moibori omwabo  Edna Kerubo Maoche. Nigo omojaji ateba inga Maoche nigo anchete Eunice. Kwoorokia obwanchani, nigo aonetie e matatu yaye ase Ksh. 300,000 na koa Eunice chibesa echio. Eunice nere akamenta Ksh. 100,000 na kogora egari arenge gotarera. Mhe. Too na Eunice nao barasetwe bare egari eyio ime.

Ekina nigo kianachwa. Rakini nigo kiarenta ebirero naende. Abaamate na abairi ba Mhe. Too na Eunice Chepkwony nigo bateba inga egesibo ekio tigeisaini. Nigo batagete akumerwe ogokwa. Nigo bateba inga emechie ya Mhe. Too na Chepkwony tekoreiri ekeene. Momura omwabo Mhe. Too, omosike Richard Langat nigo arwa ekoti ime okorera. Nabo igo ase abairi bande.

Priscilla Nyanduko nigo are Omoriki Omogeni ase Gusii.com. Amangana Korwa ENation

Komina Ebinto

Magokoro goika aganye impaka omwaka 2030, na gochia moino.

Eserikali yaito nemanyete komina ebinto na korenta eriogi. Nemanyete buna egoonchora Abananchi korwa ase amangana a muhimu ase ense na kobeka eriogi. Nemanyete buna egoitania abanto. Ritangani nigo baansete na obokora bwa 2030. Emekora. Yaani inga kende gionsi bagokora, matokeo takororekana impaka omwaka 2030. Abangaini sana. Nigo bapimete inga omwaka 2030 nigo orabae engaki eisaine ya okoiba korwa ase enyakaruga ya Abakenya. Onye kobwate riswari rinde, aye rikirerie enkoro yao ime impaka omwaka 2030. Onye kwagotire. Gwatwarire chimbuche. Gwatwarire abachokoro. Aye ayio ni igoro riao. Ganya impaka 2030. Eria kabere, bakarenta egento gekorokwa "Agenda Four" Omokenya o kawaida tatakeiri komanya inga "Agenda Four" ninki. Ekio ne egento egekongu. Getagete obongo bwa igoro. Ekio nigo giatongetwe na abanto basomete sana. Babwate chiPhD. Esemi ya igoro. Onye kwaigwete egento gekorokwa "Agenda Four" emiaka Etato yaetire, aye ganya naende emiaka Ene na gochia moino.

Komenta na "Agenda Four", bakabeka "The Committee Of Experts". Togoika ange ya abasomwa buna abwo. "The Committee Of Experts" nigo babisire aaria Sagana Lodge. Tibanya gochandwa na Abananchi. Aba nabwo batenenerete "Agenda Four". Onye gotagete komanya kende igoro ya "Agenda Four", aye boria "The Committee Of Experts". Ase engencho "The commitee Of Experts" babwate egasi enkongu aaria Sagana Lodge, imbabwate abakonyi bakorimia emerero ende yonsi egotokea. Omorero ore omonene Kenya bono iga, no obokongu bwa "Abagay". Omorero bwa "Abagay" nigo oansa iga: Abamura babere AbaKenya bakanywomana aaria London. "Abagay" bakaigwa buya. Bari batancheti "Abagay" bakaigwa bobe. Nicholas Muraguri akabwatera abwo. Nicholas Muraguri, PhD, agateba moiso onde inga Kenya neche etumie Ksh. chimilioni 40 kobara "Abagay". Eee bono. Chimillioni 40. Omosike Muraguri nere otenenerete amangana ye enyamoreo Kenya. Omosike Muraguri nere akabwata orokore orwo akaereria ekeombe kia Public Health Innovations. Menta eriogi. Ase rero, ekeombe kia Public Health Innovations nigo giateba inga goika AbaKenya banche "abagay". Lazima. Koirana maega tikoiyo.  Twanche titwancha. Eriogi rikomentwa kera rituko. Narigirie erieta rie Ekegusii ria "gay" gose "homosexual". Tindarinyora. Onde orarinyore, ka moranche intebie. Nigo inkona gotuka erieta erio erinde imanye obokongu bwa "abagay" ime ya Gusii. Ase ki? Eserikali yatebire inga intobwate obokongu bwa "abagay" Kenya. Onye eserikali egoteba inga obokongu imbore aroro, goika tomanye buna obokongu obwo bore korwa inka ritangani. Bono igo amangana aya ninki amineti? Obokongu bwe enchara, amache, chigasi, endagera, oboibi,oboiti.. Ayio tari muhimu bono. Abanene batebire. Obokongu bono no "Obogay".