Eripoti ekobwatia ne yo omwana omino. Omosubati Kerubo Nchogu. Omoriki omogeni ase Gusii.com. Ka moranche tegerera korwa ase omwarimu omonyene. Omwarimu osometie inka Gusii. Inche nigo nasoma eripoti eyio naigoka obongo sana. Konyora nigo inkagete inga nigo imanyete kera egento igoro ye esemi ime ya Gusii. Yaya. Nigo nanyora inga timanyeti kera egento. Obosemi obuya. Onye gotagete koba omoriki omogeni ase ewebusaiti eye, koranche chwata riuko gochia ase abagusii@gmail.com. Imbuya mono. Omwana omino oyio.
Kanga High School, Migori
Chisemi chiatamire Gusii yaito pi!
Gaki yabeire maiso marore bono ing’a Gusii yaito n’ebwate obokong’u ase ensemo ye chisemi. Ninki torakore tokonye chisukuru chiato chia gusii? Inaki torakore tonyorere abana baito amabaga ase chiyunivasiti chiato?
Omwaka o 2007 inachiete gosomia Egesongo ase esukuru eyemo aaria Gusii. Ekero amatemwa a 2006 asoka egatoka ing’a edistrikti ya Nyamira engima nigo yabwate chi A chietanetie isano na chinyinge chiabo nigo chiare korwa esukuru eyemo.
Omwaka oyio omwarimu omonene agatoira tochie gotarera abarimu b’esukuru ya Bogere ekorokwa Kanga High School. Esukuru eyio nigo yabwate chi A chietanetie echia Nyamira engima, chi A ikomi na isano. Esukuru yende ya western – Friends School, Kamusinga nigo yabwate chi A chiatanetie emerongo ebere ne chi B+ emerongo etano na goetania. Echi n’echisukuru ibere chioka. Nchake kobara chisukuru chiabwate chi A chietanetie echia Nyamira district omwaka oyio tingokora.
Ninki gekogera amang’ana agokorekana igo gose? Inee, Abagusii mbari koigwa masomo? Etoiboreranetigwe n’oboriri? Yaya. Tari bo nonya ng’ake. Oise korigerereria omwaka oyio oyio o 2006 omwana omotang’ani Kenya engima n’Omogusii orenge (Dickens Omanga Omosa korwa Friends School, Kamusinga). Origererie n’emiaka yende, Mogusii tanya kobora ase abana baria ikomi bagotang’ana Kenya engiama.
Eki ogoichania nkeri ng’a abana Abagusii bagotang’ana Kenya engima mara aange mbari korwa sukuru chia Gusii. Ring’ana eri riandeta ase riboria ria kabere. Sukuru chia Gusii nchibwati baarimu baisane nabinto binde buna bitabu? Yaya ninki rende gose gekogera togokora amatemwa bobe iga?
Nkaboria omwarimu o Kanga High School eki akorengereria gekogera Gusii etari gosokia matokeo akogokia. Aya naro antebetie. Ase obotuki bokeigo na korigereria, omongwana oyio nabo atomanyete.
1. Baibori ba gusii mbacharetie masomo. Omwana nabo agotomwa nka achie kwoyia efisi orasoigwa mogondo akonye gotora echae. Kero agocha koirana esukuru amange amoeterie. Kero kende nabo erabe ng’a nechisiringi mia tano chioka omwana aserigwa. Ribaga omoibori akwerina aonie nonya ne twoni aakane, onyenyera omwana oyio engoko eyio ati omwana neboarding are tarari ngoko matuko mange! Baria engoko eyio baigota omwana onya kobaracha abwo na ng’ina.
2. Abaibori ba Bogere nigo batagete abana babo baete basoe chisekenderi chingiya. Abaibori ba Gusiii nigo batagete abana baete basoe esekenderi ende yonsi. Gaki n’omo igo oranya gwechanda. Eke nekemaene pi. Narorire abana ba Gusii babwate nonya namagisi 102 bagosoigwa esekendari. Chisekenderi Chirochio nchiichire Gusii. Narorire omoibori ogocha esukuru kobetereria abaarimu basugume omwana ekerasi noyio n’omwana orakore omokia aete buya aise komanya ng’a okoirora ngokare.
3. Abaarimu abange ba Gusii nigo babwate oboarimu part time. Omwarimu ocha staffroom otebia oyonde; "nsomerie ekerasi kiane rero ndachia kwoyeria chiombe chinsiaga."
Amang’na n’amange omongwana oyio antebetie, korende koraria ayio atato. Nabo kero kende oraigwe ng’a nkong’ainereria arenge korende ntegerere. Omwana taoyetie ripoti yaye y’echitamu ibere mpaka nkamorangeria gochi komoa ekero gie etamu ya gatato. Bono gaki ise ere inaki amanyete chiropia agoakana chiare gotumeka?
Tiga ngo abarimu na abaibori ba Gusii babwaterane koimokereria chisukuru chiato. Tiga abarimu baborie eki gekogera abana batari goeta. Tagoisaransa nomwarimu hoteli konywa echae. Rigereria eripoti y’omwana oo naende mosegete akore omokia. Gaki tiga tokonye chisemi Gusii!
Nche n'omwana oino Kerubo O' Nchogu
Aya amwabo aya:
Recent Comments