Gusii

"Togembwa", Nyangau Ye Egetonto

Togembwa no onde. Nabo omwana omino, marehemu Nyangau Ye Egentonto atotebetie. Igwa bono.

"Obokiriru No Obwaki?", Fred Makamara

Na Joshua Araka: Gusii.com Nyakeore Primary School

Okobee: Fred Makamara, Okorio, omonene o CDF, West Mugirango, omosike Nyakundi aaria Nyakeore Primary School. Ebicha na Joshua Araka, Gusii.com

Omojumbe o West Mugirango, Dr. James Gesami oborigwe atige obokiriru. Mhe. Gesami nigo aboretigwe atebe eki akirerete ne chibesa chia West Mugirango CDF chisirete. Omorwanereri bwe chikura chia West Mugirango ase omwaka o 2007 omosike, Fred Makamara nigo aboretie riswari erio ase rituko ria igoro.  Nigo omosike Makamara atebete inga Abagirango Bosongo tibamanyeti eki kegendererete. Egento bamanyete gioka inkeri inga abakori emeremo bane ba West Mugirango CDF imbatenenetigwe egasi na Mhe. Gesami igoro yo ogosira gwe chibesa chia CDF.

Ritangani, Abananchi nigo batebetigwe inga Ksh 7.5 millioni chiairurukire. Korwa erio, enamba ye chibesa chisirete nigo ekona komentekana. Bono kiabeire inga chibesa chisirete nigo chire ange Ksh 19 millioni. "Echi nigo chire chibesa chia Abananchi. Omojumbe goika aike ase Abananchi erinde abaerese inga gose ingai chibesa echio chiachiete. Onye tari gocha ase Abananchi na korwa amaereso, kende gionsi nabo kerakagerwe igoro ye chibesa echio". Nabo omosike Fred Makamara atebete amangana ayio ase okorwa ebiegwa ase abana baria bakorete amatemwa buya ase omwaka oyo oera ase KCPE.

Ebiegwa ebio nigo biarwete ase omokutano orenge ase esukuru ya puremari ya Nyakeore ase ensemo ya kebirigo. Nigo omosike Makamara aboretie inga ninki gekogera Mhe. James Gesami akirerete nonya kamanyete inga Abananchi imbabwate amaswari. Nigo atebete inga eofisi ya CDF ya West Mugirango nigo ebwate obokenyomba no oboibi. Ase boigo, nigo aboretie abarimu amo na abana ba Gusii bakore omokia erinde bakore buya ase amatemwa ase emiaka egocha.

"Obo No Obosoku", Kennedy Nyamwanda

Na Joshua Araka: Gusii.com, Nyamira

Kennedy Nyamwanda, Omonyakerogo, KNUT, Nyamira. Ebicha na Joshua Araka, Gusii.com

Omonyakerogo o KNUT Nyamira, omosike Kennedy Nyamwanda oboririe abajumbe barosie chibara na amaagacho ya Abananchi be ensemo ya Nyamira. Nigo omosike Nyamwanda atebete inga nigo ere obosoku sana ekero chisukuru chinyinge chikoba echia amaraba ne ebibuse ase engaki eye ye chibesa chia CDF.

"Intwe nigo tokoboria abajumbe babeke chibesa chia amaagacho ekando erinde nario torakore amaagacho aria atakeire." Nabo omosike Nyamwanda atebete ase omokutano oria orenge Nyamira igoro. Nigo arwete omobwekano bwo Riasindani Primary School. Nigo atebete inga esukuru eyio ere ime ya West Mugirango nigo ere eya amaomo. Nigo atebete inga tiga esukuru eyio eagachwe ne chibesa chia CDF.

Omoteneneri o CDF West Mugirango, oyio orenge ase omokutano oyio nigo atebete inga esukuru eyio neche eegwe chibesa chia amaagacho. 

Kebago Orasirwe

Na Joshua Araka: Gusii.com, Nyamira

  Obokebago

Omosacha oyomo konyora oganeirie na abanyanyimbo nigo arasetwe na goitwa igoro aaria     Nyamira  ase rituko ria igoro. Nyakundi Osano nigo agateretwe ba abasigari ba Nyamira ase enka yaye ya Miruka na koraswa ekero angete kobekwa chingayo. Kobwatekana na Nyamira OCPD, Shadrack Maithya, ebastola amo na amasasi ane nigo anyorekanete ase enyomba yaye.

"Nigo twanyorete ase ebisete ekero Abananchi batotebetie, Nano OCPD Shadrack atebete. Nigo omosike Maithya atebetie Abananchi bagenderere korubora ebibago buna ebio ekiagera obokebago bwabuchire sana ime ya Nyamira. Nigo egotebekana inga ebibago ebinge biria bigosumbua Abananchi nao bimenyete aaria Miruka. Amatuko atato aerire, ekebago kende ingiatwa na abanyanyimbo ekero baruteranete amasasi na abasigari ba OCS, omosike Hesbon Lekitoi.

"Omoroberio No Omuya", Dr. James Gesami

Na James Araka, Gusii.com, Marara SDA Church

Dr. James Gesami, MP West Mugirango aaria Igena Itambe bwango iga. Ebicha na Joshua Araka, Gusii.com

Omominista omoke bwa Afya, Dr. James Gesami oboririe AbaKenya banche Omoroberio bwa Amachiko Aito Kenya. Dr. James Gesami, oyio naende ore omobunge o West Mugirango nigo atebete inga AbaKenya baganyire Amachiko ase emiaka 20. Bono tiga bayancherane erinde ense yaito egenderere gochia motwe.

"Nasomire Omoroberio bwa Amachiko Aito naende tiga imbatebie inga nigo ore omuya". Nabo Dr.James Gesami atebete ase omokutano bwo omochango bwe ekanisa ya Marara SDA Church aaria ase ekonstituensi yaye ya West Mugirango. Dr. Gesami nigo atebete inga eserikali yatomire abasemi kworokia Abananchi igoro yo obuya bwa Amachiko ayio ataraakerwa chikura.

Ase boigo, Dr. Gesami nigo aboretie Abananchi berike ase ogoaka chikura ekiagera eyio nero enchera yoka eragere baake chikura. Kobwatekana ne chikura, Dr. James Gesami nigo aboretie Abananchi batige kowerika ase chikonstichwensi chinde chiria chire omopaka buna Kitutu Chache na North Mugirango. Nigo aboretie Abagirango Ba Bosongo berike goaka chikura sobo oka, tari ase chikonstichwensi chinde.

Ayio tari aro amangana oka akwanetwe ase omokutano oyio. Omogachi o KNUT, Nyamira Branch omosike James Osumo nigo atebete inga Dr. Gesami nigo akorete buya sana kobuta abakori emeremo ba CDF ya West Mugirango baria kiaba inga baibire chibesa. "Echio nigo chiarenge chibesa chia Abananchi. Goika chibesa chia Abananchi chirendwe". Nabo omosike Osumo amentete. Nigo egotebekana inga saidi ya Ksh 10 millioni chia West Mugirango CDF inchimanyiri ase chiachia.