Obokongu Aaria Oshwal Supermaket, Kisii Town
Tata Omwabo Maurice Onsinyo

Abagusii Culture And Customs IV: Enyangi Ya Iburu (Circumcision) Ase Ebimura

 

Abagusii Wisdom Revisited

 

Na Petronillah Ogoti. Gusii.com Proverbs, Culture And Customs Editor. Monunguno O Barema (February) 15, 2011.

Aya amwabo aya:

Abagusii Customs X: Amarieta Yo Oboamate I.

Abagusii Customs: Amasangi Yo Omosubati Ogosoka Isiko Ye Enywomo.

Abagusii Customs: Traditional Regalia (Ebibekerero Ao Ao Bie Ekegusii).

Abagusii Customs: Ase Abagusii, Ogotakerwa Ninki?

Iburu

"Nintagete kogenda bware" Ebimura binde can't wait kogenda iburu.

Iburu, maguta motwe no okwaroka na amarieta ye Ekegusii yo ogosara. Abaisia ki baikire emiaka ikomi mbaka ikomi ne ebere nigo bare goisanera kogenda iburu. Mara enyinge, iburu nigo yare gochiegwa ase engaki yo omotienyi bwe Egesunte kende (December) ase kera omwaka.

Abaisia nigo bare kwearigania ase omoyega oyo buna ekobwatia. Nigo bare korigia chingoko bagochia konyenya ne ebitugi bio ogouta omorero ekero bare nyomba. Inyora inga morero bwo omware tonya korima.

Omosari nigo arenge koba oyomo ase ekenyoro ekegima na abasae bataranywoma nabwo bare kobira abaisia ekero bare gochia iburu. Obotuko bwo ogokiera rituko rie enyangi ya iburu, aba be enyangi nigo bare korara na abamura barie bachiete iburu banyenya chingoko.

Mambia maaambia, nigo abaisia aba bare koirwa roche gwesibia amache amakendu na korurwa ne chinyanduri ne risa egere beariganie ase enyangi eye. Abasegi nigo bare kobogoria amatimo na kweboyia amayo.

Egetono nigo kiare korosigwa kiamanya koruma buna endo. Aaiga, nigo bare gotebigwa buna endo igo yare kobamera nande yabaroka. Ekero kio ogosarwa gwaikire nigo oyo ore kogenda iburu are gotarera omote gochia magega egere tarora amanyinga buna agoiteka.

Korwa aiga amatera yo obware aterwa kwagachia ase omware are koirwa. Omorero nigo ore gosegeswa bwoka amatuko onsi pi omware are nyomba. Ki yare komochani orime, nigo yare koba chimuma naende yare kobetereria okorerane chisokoro.

Omware nigo are gosoa saiga na korwa gesieri korende tare koirorera goeta gesieri eke. Korwa bono, nigo are gotumia etirisa. Omware nao agasokeire etirisa ochia gwota ensakia korende kera rituko nigo are kweyaka ribu.

Mware tare korora gose gwesibia mache mpaka arwe nyomba. Abare nigo bare kobeka egesena. Abwo nyomba, nigo bare gokora emekubio ene.  Engaki eyio ye emekubio ene kiyaerire, nigo yare gokagerwa buna omware obwenire na korwa nyomba.

Ekero akorwa nyomba, mware tare gweeta gesierie keri asoerete. Nigo are kogenda roche bwesibia na kweboyia buya. Korwa aiga mware tare korara saiga aria ase arenge nyomba. Nigo are korara ase eamate amatuko abere omanya koirana sobo.

Goansera aiga omware bono nigo are no obosiborwe bwo ogotumia gesieri kende gionsi gia saiga. Bono gochakera engaki eye, momura bwarogete tare gosoa ase abaibori bare korara. Echio ne chimuma. Inee rero enyangi eye nereo?

comments powered by Disqus