Omogano Bw' Omogusii [Abagusii History]: Chinyomba Chio Omogusii [Abagusii Clans ]
Omogano Bw' Abagusii: Nchwo. Mwaariganigwe Komanya Ase Twarwete

Omogano Bw' Omogusii [Abagusii History]

 

 
 
Buna twakabeire amo na PETRONILLAH OGOTI: Mwanyagetinge.com Proverbs, Culture And Customs Editor. Obotuki bonde amo na Abner Nyaberi, Kenyatta University.
 
 
Omogano Bwo Omogusii:

Oral Sources On The Ground:

Omongina Kwamboka Mireri, (Ichuni) Bomobea, Nyaribari Masaba;
Omogaka Samuel Omare Nyambisa, (Gesure) Bosansa, Bobasi Chache;
Omogaka Kenyanya Marube, (Otamba) Bogeka, Nyaribari Chache;
Amaumuntia (May) 26, 2012.

 

Aya amwabo aya:

Abagusii: Ingai Twarwete?

The First Gusii.com Blog Post On February 22, 2009.

"Bono Ninki Mokonya Korikera Igoro Y' Outdated Customs And Traditions?" Omongina Clemencia Mokeira

 

 

Omogano Omotangani [I]:

Emegano y' ororeri rwaito ntwe Abagusii n' emenge.  Nigo togotebigwa buna ntwe Abagusii twensi nigo twarwete aaria Misri. Kobwatekana n' omogano oyomo, ororeri rwaito nigo rore iga:

Omonto akaibora Enonko. Enonko akaibora Ribiaka. Ribiaka akaibora Magoma. Magoma akaibora Osogo. Bono Osogo nere akaibora Mogusii. Bono sokoro yaito Mogusii, akamanya koibora Mogusero, Mochorwa, Mobasi, Nyaribari, Mogirango, Mogetutu, Monchari, na Momachoge.

 

Okonywoma n' okonywomwa gochia ase ebisaku binde nkare gwaansete: Aaiga Transmara nao omosubati oyomo o Gusii orenge korokwa Koinania anywometwe n' Omomanyi na gotigara aroro. Gatigara oo, ntwe tokagenderera n' orogendo rwaito gochia Botende. Ase igo, twensi n' abamo n' Abamanyi egekogera mbabwate amanyinga aito.

Transmara. Aaiga nao omosubati oyomo bw Abagusii anywometwe na gotigara

 

 Abangina b' omogaka Mogusii

Mogusii nanywomete abakungu batano buna ekobwatia:

1. Moguche Ibu ore korokwa Kemunto akaegwa erieta rie ebitinge, akarokwa Bonareri.
2. Nyamisanchu ore korokwa Kwamboka oetwe Nyaboke, koba  erieta rie ebitinge.
3. Bosibori nere obwate omomura okorokwa Mochorwa.
4. Bwari nere oiborete omomura okorokwa Omache, o Monchari. Omache nere naende orogetwe Onchari Omache, Chindiba Chia Bokendu.
5. Mokeira, oyio oiborete Sereti, oyio ore Omogusero. Abangina ba Mogusii bonsi
Abaminto manya buna buna nonya emegano yo ogocha n' okonganya kwa Abagusii kere emenge, tiyarigetwe aande. Emegano eye nigo rayenge gotebwa koru ase abanene gochia ase abake. Ntwe nigo tokoyerika bono buna togotebigwa. Ase boigo, nigo togotebigwa buna ase chingaki echio chionsi , eganga ya Abagusii nigo yarenge konganya ase okorigia ense entobu ase ebimeri.

 

Gotenena nkwarengeo. Onye ememiso gose emesabakwa tiyarengeo, abagaka nigo barenge goteba nga "Togenderere gochia motwe".

Omogano O Kabere [II]:

Ase okonganya gwaito, abagaka abanene nigo barenge korigia ase ememiso amo n' emesabakwa ere emenge. Ebi nabio biare kobaorokia buna ase ayio natobu. Omogano o kabere nigo ore iga:

Omogano oyo nigo ogoteba buna Omogusii nigo arwete korwa chinsemo chia Irianyi gose ensemo ya Mombasa, goikera agacha goika aiga nka Gusii.  Ase Abagusii, Mombasa eyio, nigo naende yarenge korokwa Mokendo o' Iruma.

Nigo togotebigwa buna Mogusii narenge na momura omwabo ore korokwa Otere oyio onaende ore korokwa Mogikoyo. Abamura aba babere nabwo batirete korwa Irianyi ya Mokendo o Iruma (Mombasa) na gocha gatigati ya Kenya.

Aiga gatigati ya Kenya, Otere nao atigarete. Mogusii amo na basubati bamwabo bakanyora buna ememiso amo n' emesabakwa tiyarenge aaiga gatigati ya kenya. Korende Mogusii, kare na abasubati bamwabo bakagenderera ase okong'anya ko batiga Otere aaira gatigati ya Kenya.

 

"Mokogoti" narengeo koru kare

Omosubati oyomo ore korokwa Moragori, nigo atigarete aaria aange na Mt Elgon (Boruya) ase okonganya, akaba ngina Abamaragoli. Omosubati onde, Mosoba agatigarera igaaria Suba. Ase boigo, omosubati onde omwabo Mogusii, ore korokwa Mokogoti, naende gose Mokoro, nigo achiete agatigara aaria Botende (Kuria).

Korwa gatigati ya Kenya, Mogusii nigo atorete aaria Boruya. Nonya nabo igo, nigo banganyete naende korwa Boruya na komotiga Moragori  aroro. Korwa abwo, bagatirimboka gochia chinsemo chia Irianyi ya Boruya na goika Egesumu (Kisumu).

 

 

Below: Beautiful Mokendo O' Iruma: Omogano onde bw' Abagusii nigo ogoteba buna Mogusii amo na abamura babwabo abwo barenge Otere [Mogikoyo], Momeru, Mokamba, Moragori amo na Moembu nigo baimogete ase orogendo korwa aaria Mokendo O' Iruma [Mombasa]. Ntomanyeti buna ninki kiagerete Mogikoyo, Momeru Mokamba, amo na Moembu bagatigarera aaria Central kenya, korende Moragori amo na Mogusii barabwo bakagenderera n' orogendo. 

Mokendo i iruma

Aaiga ase ensemo ya Egesumu, bakaagacha egesarate gio okomenya (ebisumu) abwo Egesumu (Kisumu), korende chimori chikaagacherwa ebisumu ebinge. Mogusii akaroka asaya, Egesumu (Kisumu) korwa ase ebisumu ebi baroseti.

Buna togotebigwa, aaiga Kisumu nao omomura oyomo orenge korokwa Orechi [Enswe ase Ekegere] aiboreretwe. Ase boigo, aaiga nao omoiseke orenge korokwa Kemunto (gulf ase Ekenyamorero) aiboreretwe.

Mogusii tachieti komenya abwo Kisumu ase amatuko amange. Ogocha kwa Abagere amo n' riroba gotaba riitobu gokagera Abagusii naende bakanganya korwa Egesumu kogenda ase akorokwa Gwasi. Aaiga Gwasi, riroba itobu ndiarenge aroro nonya.

Ase engencho eyio, Abagusii amo na abande naende bakanganya na gotiga Mosoba (Abasuba) aroro. Aaiga Bosoba nao omwana omomura orenge korokwa Mosoba aiboreretwe.  Korwa Kisumu, Mogusii bagaeta na gotamboka ase Ekemunto (gulf) na kwamboka gochia ase ebitunwa bia Gusii.

Ko baika Gusii, bagaatanekana. Mokoro akagenda Botende (Kuria) na Mosoba akamboka kogenda Bosoba (Suba). Nonya nabo igo, Mogusii ere agatigara Gusii na mbaka rero nao are Gusii. Oyo noro omogano bw' okonganya gwaito o kabere.

 

Aba bonsi n' abaminto. Omokamba, Omoragori, Omogikoyo, Omoembu, Omomeru, Omotende, Omosoba: Nigo tokona goitana bosa. Aba mbamura n' baiseke baminto.


Omogano O Gatato [III]:

Omogano onde bw' omochakano bwo Omogusii nigo ogoteba buna Abagusii nigo barwete Misri (Egypt ase rero). Ritangani, nigo togotebigwa ng'a Mogusii, oyio ore ise bw' Abagusii bonsi, narenge amo na bamura babwabo abwo barenge Moragori, Mokamba, Mogikoyo, Moembu, amo na Momeru.

Baminto tata ng'ai twarwete?

Baminto tetebie ase twarwete

Nigo togotebigwa buna Mogusii, kare na bamura bamwabo, nigo atirimbogete ase chingegu chi' oroche rwa River Nile na goeta gati gati y ense ya Ethiopia. Korwa abwo, akagenda Sudan na gosokera aaria Uganda. Korwa Uganda (Boganda), Mogusii nigo agendererete n' orogendo mbaka agaika aange na Mt. Elgon.

Nigo togototebigwa aaiga Mt. Elgon, nao Mogusii aatananakenate amo na abamwabo, na kogenda kobwaye. Moragori ere agatigara aaria ange na Mt Elgon, na koba ase egesaku kia Abaluhya. Gatiga abamwabo, Mogusii akang'anya na kogenda komenya aaria aange na Siaya, eyio ere Bogere ase rero.

Ntomanyeti buna ninki kiagerete Mogusii agatiga abawabo ase okonganya oko. Ase engencho y' chisegi korwa ase Abagere be ense eyio ya Siaya, Mogusii akang'anya naende, korwa abwo na kogenda komenya aaria Egesumu (Kisumu).

 

Erieta "Kisumu" n' rie Ekegusii !!

Aaiga, Egesumu, nigo Abagusii baagachete ebisumu ebinge bie chiombe, ekagera bakayaroka (Gesumu) Kisumu. Nigo togotebigwa buna aaiga Gesumu nao Mogusii amo na ng'ina, oyio orenge korokwa Nyakomogendi basirerete na gotindekwa.

Nonya nabo igo, chiombe chigaansa gokwa n' enchara enene ekaba abwo Egesumu. Ge enchara yaba, abana ba Mogusii tibachieti komenya igaa ase amatuko amange. Ase engencho y enchara eye, abagaka abanene b' egesaku giaito ase engaki eyio, abwo barenge Mobasi, Oibabe, Mochorwa na Mogusero bakaroberia okonganya kwa Abagusii korwa Egesumu, kogenda gochia ase ebitunwa bia Gusii ya rero.

Ke emeroberio eye y' okonganya yaera, bagatamboka ase ekemunto (gulf) na goika ase ebitunwa bia Gusii ya rero. Korwa ase ebitunwa bia Gusii, bakagenderera konganya mbaka bagaika Kericho [eye nero naende ekorokwa Kabianga].

 

Erieta "Kabianga" n' rie Ekegusii !!

Ko baika Kabianga, obokongu bokaba. Ndagera tiyare kwama. Tari igo rioka. Esegi korwa ase Abamanyi amo no Abasigisi ekaba entindi. Komenta nayio, oborwaire obonge ase etugo amo na abanto bokabucha. Bono emechando eye yonsi ekagera Abagusii bakaroka ase aya, Kabianga.

Ke emechando emenge yaba aaiga Kabianga, Abagusii bakanganya naende na koirana bagotirimboka gochia Sotik, Gelegele, Ikorongo, Trans Mara [ Emara gose Transmara, Mara Motobo, Igena ria Gamba].

Naende nigo tokona goitana bosa. Abamanyi mbabwate amanyinga aito ntwe Abagusii.

Aaiga Emara Motobo nao omosubati oyomo bwa Abagusii orenge korokwa Nyakoinania anywometwe amo na Abamanyi na gotigara Bomanyi. Korwa abwo, Abagusii bakagenderera ase okonganya gochia Migori (Botende), Nyangarora, Nyakoe, Getembe [ ange na Marani], Manga Isecha (Emanga y' Ogeto, na Monyerero) ime ya Central kitutu, amo na aaria Emanga nse ya Ikuruma.

Egesaku getabwati abarai nigo kegotagoka. Abarai ba Abagusii mbakabeiroo koru kare!!

Abwo ase obomenyi n' okonganya gwaito gwensi korwa Egesumu, Abagusii ntwabwate abagaka abanene abwo barenge korwa oborai amo n' obosemia. Gati y'  abagaka abwo ase chingaki echio nigo barenge koraa chinyomba chia Abagusii nigo barenge buna ekobwatia:

[I]. Abanchari [Omogaka Oisukia nere orenge omorai].

[II]. Ababasi [Mogichoncho, oyio orenge omomura omonene o Mobasi nere orenge omorai].

[II]. Abasweta [ Omogaka Manyanta nere orenge omorai]. Ka moranche inyora buna Abanyaribari amo na Abamachoge nabwo Abasweta. Abagusii mbebagete amarieta gete ye chingiti ao ao, amarieta ayio akabwata. Omogaka Manyanta nigo arenge koraaa Abanyaribari amo na Abamachoge bonsi.

[IV]. Abagetutu [ Omobani Sakawa nere orenge omorai]. Ase okoinyora naende, Omobani Sakawa nigo arwete ase enyomba ya Abageka aaria Bogetutu. Abageka nabwo barenge enyomba enchorwa ya ababani ase Abagusii. Tochiesera Abageka.

Next In This Series: Omogano Bw' Omogusii [Abagusii History]: Chinyomba Chio Omogusii [Abagusii Clans ]

 

comments powered by Disqus