Gusii

Emebayeno Y' Abagusii: Ey' Etari Na Kemincha, Tiga Etirerie Ekeene

 Buna twakabeire na Petronillah Ogoti. Gusii.com Proverbs, Culture And Customs Editor. Ebwagi [June] 22, 2012.

Abagusii Wisdom Revisited

aya amwabo aya:

Ogochaya N' Okobe

Endamwamu Nembe

Emegano Y' Abagusii XXIX: Monto Monene Ndiogo, N' Obochayi N' Obobe.

Abagusii mbatebete buna ogochaya n' okobe, na gototebia buna "Ey' etari na kemincha, tiga etirerie ekeene" Bono igo naki? Nigo sokoro ominto agoteba iga:  Riria omogaka Onduso aimokire gokwana iga, omogaka Kebiro nigo akoimoka korwa ensemo na goteba buna, "Kai! Naye ninki obwate ogototebia...... Motebie aikaranse"

Amasikani n' egento ekiya. Eeeri eyio netaba n' ekemincha, nigo egotireria ekeene. Abagaka baimokire kogenda aase etureti kogayana. Picture na special correspondent, Gusii.com files.

Bono omogaka Onduso ere tatakeiri gokwana, gose koigweka. Oikaransigwa na gokanigwa, taakwana. Ere nigo amanyire buna tabwati kende aratebie abamwabo aase etureti yaikaransire. Nigo okonyora buna ekero gie etureti, abanto  bonsi nigo bagoikerana, mbaka bari  bachaire.

Ori ochaire ekero akoimoka gokwana, abanto  bachaka kweonya buna nere ninki arakwane. Korende magega yaye, abanto bagochia goitona, baanyora buna eng'ana y' oria bachaete, nigo yare ey' eng'encho kegima [ etirerie ekeene ].

Nere buya ebirengererio bia kera oyomo biategererwa. Neba mbari bakageire koba abariri  [ batabwati ekemincha ], nere  buya baegwa chingaki, bakwana aya babwate. Ogochaya buna oko nakwo kwagerete Abagusii abakoro bagateba buna "Ey' etari na kemincha, tiga etirerie ekeene". Oyo noro omobayeno oito for this week. Korwa ase omogaka sokoro ominto, mbuya mono and thank you for listening.  

Welcome to Gusii.com @ Facebook Group 

Abagusii Culture And Customs XCIV: Omokungu Omosiomiasiomia!, Part II

 

Buna twakabeire na Petronillah Ogoti. Gusii.com Proverbs, Culture And Customs Editor. Ebwagi [June] 22, 2012.

Abagusii Wisdom Revisited

Aya amwabo aya:

Ekegusii Months Of The Year.

Abagusii Culture And Customs LXXXIV: Omokung'u Omosiomasiomia!

Abagusii Culture And Customs LXXVIII: Bono Omorominta Ning'o Ase Omogusii?

Amatuko amake aerire, omogaka sokoro ominto nantegerete omoino okorwa "Omokungu Omosiomasiomia!" Ase rero, omogaka sokoro nigo atagete kogenderera n' omoino oyio ase enchera y' obotambe, ogotera buna ekobwatia:

Omokungu  siomasiomia, Kai akomanya bwarugeirwe;

Omokungu siomasiomia,Kai akomanya bwarugeirwe:

Kai akomanya bwarugeirwe,gose mboke gose mbwa mwana;

Kai akomanya bwarugeirwe,gose mboke gose mbwa mwana;

                    Boseeeraaaaaaaaaaa!

                     Boseeraaaaaaaaaaaa,etago yane!

Mosaiga  Siberia ong’e,Toa monto okobayabaya;

Mosaiga Siberia ong’e,Toa monto okobayabaya;

Toa monto okobayabaya,nkai akomanya chiariseirie;

Toa monto okobayabaya,nkai akomanya chiariseire;

                    Oraiyaaaaaaaaaaaaaaaaa!

                     Oraiyaaaaaaaaaaaaaaaaa,engero  yane!    

Auma Aka ng’umbu,Auma gento tikeri rooche;

Auma aka  ng’umbu,Auma gento  tikeri rooche;

Auma gento tikeri  rooche,Auma sasati ekona kwoga;

Auma gento tikeri rooche,Auma sasati ekona kwoga;

                      Boseeraaaaaaaaaaaaaaaaaaaaaa!

                       Boseeraaaaaaaaaaaaaaa ,etago yane!    

Seito bonyaseito,Seito as’abamura bakwangwa;

Seito bonyaseito,seito as’abamura bakwangwa;

Seito as’abamura bakwangwa,k’abagaaka bagecha emiobo;

Seito as’abamura bakwangwa,k’abagaaka bagecha emiobo;

                      Oraiyaaaaaaaaaa!

                       Oraiyaaaaaaaaaa,engero  yane!

Kero nkorisia  kioge,nkaigwa ebikuro Bonyando;

Kero nkorisia kioge,nkaigwa  ebikuro Bonyando;

Nkaigwa ebikuro Bonyando,Ririonya ri’ensoti riaitire omo;

Nkaigwa ebikuro Bonyando,Ririonya ri’ensoti riaitire omo;

                  Boseeraaaaaaaaaaaaaaa!

                  Boseeraaaaaaa, etago yane.

Onye omokung'u oyo ogendererete gosiomasiomia, egesiongororo kerokio rende?  Nyang'au y' Egetonto nigo atebete buya buna, "Nigo gekominyoka korwa Nyanchenge....... ake ake igo, ekio aaria Tabaka. Nigo gekoboka riria, naende kiarara riria.

Tari igo rioka. Aye riria kwaagachire enyomba, otaratora, giatorire kare.. Otaramanya kende, kiarangeirie ensagara yamwabo gekoyetebia buna naye nchwo bera igaa ensemo....."

Omwana omino, Dismas Nyang'au Y Egetonto naende oyio. Enjoy

 

Welcome to Gusii.com @ Facebook Group

Abagusii Culture And Customs XCIII: Amarieta Y' Amakonde N' Ebichuni Ao Ao Ase Ekegusii [I]

 

Buna twakabeire na Petronillah Ogoti. Gusii.com Proverbs, Culture And Customs Editor. Ebwagi [June] 21, 2012.

Abagusii Wisdom Revisited

Ntwaroche amarieta y' ebichuni n' amakonde ao ao aria omogaka sokoro ominto atosometie ase ewiki eye yaerete. Ase rituko ria rero, omongina magokoro baba ominto nigo atagete kobwatera korwa aaria ase sokoro atigerete. Ase rero, amarieta ayio nigo aare buna ekobwatia:

Aya amwabo aya:

Abagusii Culture And Customs LXXVII: Bono Emonga Ninki Ase Omogusii?

Abagusii Culture And Customs LXXXIX: Amarieta Y' Amakonde N' Ebichuni Ao Ao Ase Ekegusii [II]

Abagusii Culture And Customs LXXXVIII: Amarieta Y' Amakonde N' Ebichuni Ao Ao Ase Ekegusii [III]

23. Embogo: Tsetsefly. Embogo nigo yaroma  emori  y' magokoro, goikera yabasoka.

24. Risami: Caterpillar. Obe! Risami riaromire omwana  mbka obimbire.  

25. Engige: Locust. Ekero Monari aiboretwe, nario chingige chiarenge koria endagera ase emegondo Gusii.

26. Egesiriri: Cricket. Egesiriri  nigo giatwogerera bwakia mbka twasinywa korara.

27. Eng'enang'eni: Star.  Rero nigo ense ebarete okobuga mboramisa. Nigo ching'enang'eni chirabete  se.

Rero ndero ritimbo riagonkire. Ritimbo ndigotoboa. Nigo enyomba eye yaagachetwe n' chibao chiaakire amaguta buya. Enyomba y' omongina Bwari, aaria Gesonso.  

28. Oborooro: Chicken Louse. Oborooro bwaitire chingoko chia Bitutu.

29. Embongi: Weevil. Ebando eye nigo ebongire yonsi.

30. Emonyo: Soldier Ant. Chimonyo chiaichoire ekeoreri igoro. 

31. Oronyambobe: Spider. Nigo oronyambobe rwarasa magokoro ebigoti igoro.

32. Omwosi: Earthworm. Mong'are nigo are omwoba. Nigo arora omwosi okomotaara, okura bororo.

33. Enkoromba: Mosquito.Enkoromba eye yandomire na gontiga ngosarera .

34. Ritimbo: Wood boring beetle. Rero ndero ritimbo riagonkire!

Mbuya mono korwa ase magokoro ominto and thank yuou for listening.

Welcome to Gusii.com @ Facebook Group

Aaria Sotik-Borabu: Obokong'u Mbwabete

Na Petronillah Ogoti. Gusii.com Proverbs, Culture And Customs Editor. Ebwagi [June] 20, 2012.

Abagusii Wisdom Revisited

Obokongu mbwabete aaria ase orobebe rw' Borabu-Sotik. Bono obokongu obwo bwabete nigo bwagerete abasacha babere kogenderera korwanerera obogima bwabo aaria Kisii Level 5 Hospital kobwatekana n' ogotigerwa chingoma n' abaibi simbiri.

Nigo abamenyi b' Esise Location, Borabu District ime ya Nyamira County, bagoteba buna aba babere nigo banyorete chingoma, ekero baimogete gotanga oboibi bw' chiombe n' etugo yabo, ase rituko ri' igoro botuko.

Ogoitana, amo n' obokurumi gati y' abamenyi b' orobebe oro rw' Sotik-Borabu kwarabeire ase amatuko amange. Nigo twatebiigwe buna omogaka oyomo nigo aatetwe amaiso aaria Kineni, Borabu bwango iga, amo na abaibi b' chiombe.

Ase boigo, nigo egotebekana buna omwarimu oyomo nabetetwe n' chinsara, korende obwenire. Ase obokongu obo bwabete igoro, abamenyi nigo bagoteba buna simbiri nyamoibi aange ikomi n' batano, nigo baachete abwo ase ekenyoro gie' Esise na gokora ebitage ebio. Igwa bono oonsi, korwa KTN, Borabu-Sotik.

                                           

Welcome to Gusii.com @ Facebook Group

Abagusii Culture And Customs XCIII: Ekegusii Ekero Omogaka Obwate Abakungu Abange Asirire

 Buna twakabeire na Petronillah Ogoti. Gusii.com Proverbs, Culture And Customs Editor. Ebwagi [June] 19, 2012.

Abagusii Wisdom Revisited

Aya amwabo aya:

Abagusii Culture And Customs XLVI: Ekemira Ki' Ogotindeka Oyosirire (Abagusii Burial Ceremonies)

Abagusii Customs XIII: Enyangi Ye Ebitinge (Abagusii Customary Marriage)

Abagusii Customs XIV: Mosamba Mwaye (Newborn Customary Ceremony)

Ogokobani nkwarengeo ase Ekegusii

Omongina magokoro Moraa ominto nantagete gontebia engana. Baba nigo atagete gonsemia igoro y' ogosira kw' omogaka oria obwate abakung'u abange. Ekero omogaka ore n’ abarugi abange akuure, Ekegusii gete ki' eng’encho nkiagakorirwe, buna omong’ina magokoro Moraa agoteba. Bono buna omogaka oyo atweka mo iga, nigo kera omokung'u oye, arenge kominyoka gochia mwaye ogokobani. Inee bono ogokobani ninki? Nabo oraborie.

Eee abakungu abange mbakanywomirwe n' omogaka oyomo ase chingaki echio chi kare. Ebitega mbiakaarekirwe, n' ebinto biaturekwa, naende biagororokigwa, ko omogaka bw' omochie asirire. Below: Nka Gusii

Omong’ina Moraa nigo agoteba buna ogokobani n’ ogoonchora chianga, omong’ina akobeka. Nigo omong'ina nyene nyagosira arenge kobeka chianga chia ime, maonchorerane. Korwa abwo, omanya kobeka chianga chia nyagosira korwa igoro, nachirochio maonchorane!

Naende omong'ina nyene nigo arenge kweyaka riibu, ko omogaka oye asirire

Tari igo rioka. Kera omong’ina nigo arenge koeyaka riibu, buna omware. Komenta nayio, kera omong'ina tarenge gwesibia. Yaya. Aase engaki eye yonsi y' ebirero ekero omogaka oyo akuure, omong'ina oyo tarenge gokwanigwa n' okoboko, goikera ebirero biaerire.

Nigo baba Moraa akomenta buna mong'ina oyo tarenge koererigwa endagera koboko. Nigo endagera yarenge goterekwa nse, omong'ina oyo omanya koyeimokia korwa nse. Emorogoba y' omogaka oyo gosira, kera omokung'u nigo arenge kobera mwaye.

Nigo omogaka nyagosira arenge kobekwa mw' mosera ibu omonene ritang'ani

Korwa abwo, omobere bw’ omogaka oyo orentwa na gosoigwa mw’ mosera ibu [ omokung'u ] omonene ritangani. Korende onye mosera ibu tari moyo, omokung'u o kabere ori ore moyo nao omobere orenge koirwa.

Kera mosera ibu nigo arenge kobera mwaye, orara goikera rituko riria ri' ogotindekwa. Emaambia yaye ase rituko erio ri' ogotindekwa, omobere nigo orenge gosokigwa. Korwa abwo, embera yaremwa. Magega y' embera koremwa, omomura omonene bw’ enyomba enene nere orenge goaka egekamago ki' oboina.

Onye omomura omonene bw' enyomba enene taiiyo, omochokoro bw’ omomura omonene bwe enyomba enene nere orenge goaka egekamago ekio ki' oboina. Ekero engaki y’ ogotindekwa yaikire, abang’ina b' omogaka oyo bonsi nigo bare koruta amaraba gochia ase embera.

Mosera ibu omonene nere orenge gochaka koyaruta amaroba aya, abande babwatia korwa magega. Omobere gotubereirwe, kera oyomo omanya kogenda mwaye. Emoroba oyio ko omogaka atindekirwe, kera omong’ina nigo arenge konyenya eming'ichi y’ ogokendi enyomba.

Abakiare ba nyagosira mbange koria emingichi eye. Yaya.

Eming'inchi eye nigo yare koriegwa n' onde bwensi ase eamate, otatiga abakiare ba nyagosira. Emaambia yaye bogokiamoka, abang’ina b' omogaka oyo bonsi nigo barenge kogingerana etuki, aase oboina igoro. Ase boigo, abangina aba nigo barenge kobutorwa ebitinge, bamanya kobibeka ase embera igoro.

Ko babekire ebitinge ebi aase embera igoro, kera omongina nigo arenge koirana mwaye. Korwa abwo, egoree yanyenywa, erinde ebitega biarekwe. Ekero ebitega biakorire koarekwa, ebinto bi' omogaka nyagosira nigo biarenge goturekwa. Bono ogoturekwa ninki? Naende nabo oraborie. Ritangani, ritimo rio omogaka nyagosira nigo riarenge goturekwa, riarigereria gochia nse. Korwa abwo, ekerogo kiaye nyamagoro atato, nakerokio nigo kiarenge goturekwa.

Ko ogotureka kwaerire, amarwa nigo arenge kwengerwa egetera ime, akora amatuko atano n' abere. Omongina magokoro Moraa nigo akomenta buna korwa abwo, ebinto nigo biare kogororokigwa. Bono okogorokigwa ninki? Naende nabo oratware riborio riinde.  Ritimo n’ ekerogo kia nyagosira, nigo biarenge gotenenegiwa buya.

Aya gakorirwe, abang’ina aba bamanya kobeka chianga buya bono, na gwesibia omobere erinde abaamate bonsi mbaka aaria ase abasubati basogete bacha bakora omoyega omonene. Omong'ina magokoro Moraa ominto nao akorera abwo na goteba buna monywe mache maya goikera chingaki chiinde. Mbuya mono and thank you for listening.

Welcome to Gusii.com @ Facebook Group