Ase Mwanyagetinge Abeta: Mwaariganigwe Gocha Kogokigwa Na Koyunga Ase Esagasaga Night 2013, Nairobi.
Ebitandawili LXXXIV: Ere Nigo Akoria Endagera Ao Ao, Korende....

Emegano Ya Abagusii LXIX: "Yaa Ogasusu, Naki Okare Koragera Aye Bweka Iga? Omansamu


Na Petronillah Ogoti. Gusii.com Proverbs, Culture And Customs Editor. Riete [August ] 29, 2013
 

Aya amwabo aya:

Emegano Ya Abagusii V: Ogasusu Oitire Abana Bo Oganchogu!

Emegano Y' Abagusii XLII: Bono Ogasusu Oansire Oboonchoreria

Emegano " Abagusii XXXVI: Naende Ogasusu N' Omansamu Baetanire!

Abwo kare kare, Ogasusu narengeo. Bono Ogasusu oyo nigo achandete ching'iti chinde ekero chiamenyete n'oboamo. Ching'iti echi nigo chiare kogenda chiarigia endagera erinde chiacha kobeka mboto ase oboamo, korende Ogasusu nigo akabatisire, takogenda korigia endagera.

Bono Ogasusu oyio ogotigara magega, koinagera endagera!

Nigo arenge gotigara magega, erinde oria endagera eye ching'iti chinde chiare koreta chiagacha kiage erinde chiche koria engaki y' enchara. Ching'iti echi chikaigwa bobe mono. Gati ye chingiti echi, Omansamu ere agatiana korigia Ogasusu na komobwata amotwange.

Ching'iti echi chikaba chigotega Ogasusu gose nchimonyore ekero akoiba endagera eye yabo. Nonya nabo igo chikarigia igo, korende tichianyora Ogasusu oyo ekero akoiba. Bono engaki eyemo, Omansamu agatigara orosana oro ase bamenyete erinde arende Ogasusu oyo simbiri nyamoibi, gose narore buna akoiba endagera eye bagachete kiage erinde ching'iti chicha koria ekero ki' omorakera.

Tabia mbaya. Bono Ogasusu oyio ekiage ime, koinagera na gokung'unta endagera yonsi pi

Ogasusu oyio okoinagera na gokungunta kera egento

Omansamu gakirete iga, akaigwa omonto ogosensera. Ogochia gosiomia, akarora buna  agochoba gochia ase ekiage kiare na gosoa ekiage eke ime. keri keri, Omansamu akaigwa Ogasusu okare gochoba ngora ngora.

Simbiri nyamoibi Ogasusu, obwatirwe ogosenyenta endagera

Chintunde nke igo, Omansamu agachoba ng'ora igo gochia ase Ogasusu arenge korende Ogasusu akaba gakoigwa Omansamu buna are komochobera. Korora Omansamu, Ogasusu agacharoka na kominyoka agasoa engoro yare mbarabare ime.

Omansamu akaminyoka na gotenena ase engoro eye igoro erinde akaganya Ogasusu asoke erinde amokorere aya atianete komokorera erinde nario atache airore koiba endagera ye ching'iti chinde konye chiachire chiarigiri na kogacha ekiage ime erinde chiche koria ekero ki'omorakera n' enchara.

Ogasusu agasinywa buna agosoka korwa ase engoro eye ime ekiagera engoro eye yabwate ase omong'anyi omong'ao. Bono ogasusu akarora buna goika arigie obokora boramokonye erinde asoke korwa aaiga.

Ogasusu ngoita are obongo!

Ase boigo, Omansamu tanyara komobwata. Bono Ogasusu agaita obongo igo, goikera akanyora richibu. Inyora buna konye Omansamu okembire ogasusu asoke korwa engoro eye ase egeka getari geke, na konye bono enchara yamorire. Korwa engoro ime, Ogasusu agachaka goaka omonu, buna ori okare koria egento egetonontu.

Koigwa iga, Omansamu nere ogakare goaka omonu okobora, "Yaa Ogasusu naki okare koragera aye bweka iga? Gaki ndomi geke nainche enchara yanyarire?" Ogasusu koigwa iga, akagoka na gosasoka na ogakare gotebia Omansamu buna "Egento eke kegotonontera buuya, onye gotagete nkoromi naye orie geke, togoria amaiso nkoe bono"

Bono Omansamu oyio ogotogoria amaiso!

Bono buna Omansamu arenge n' enchara, akaigwera na gotogoria amaiso gochia igoro. Bono Ogasusu korora buna Omansamu otogoiri amaiso, akaiomokia amaraba na gosiarera Omansamu amaraba aya gochia ase amaiso ime!

Bono kai tata!

Omansamu agachaka komiga amaiso gakorera. Erio erio, nario Ogasusu anyorete ribaga, akaminchoria korwa ase engoro eye ime na kominchoka, agaaka embuna, tabwatwa. Omansamu agatigara kare n' obororo obonge. Nere Ogasusu agatama na korwa erio, akang'anya korwa aaiga na kogenda orwao.

comments powered by Disqus