Gusii

Gokaranga Chibando Saiga

Edwin Okong'o, Omwana Oito Mache Ng'umbu okarangire chibando. Yaani nere bweka okona koria chibando saiga mwaye. igwa bono

‘Nabeire Buna Riria Nabete’

Omoriki ne Edwin bw’ Okong’o, Omwana Oito o Mache Ng’umbu

 

Kero kende konde Nairobi togaikaransa emesa koragera no omosani one okorokwa Motanya na momura oye Mogeni. Omong’ina oye Nyakerario konye ominire obokima bw’ obori ne enyama ye embori, chinsaga na amabere amaruranu amaroro se abwate amakombi amanene ndagoake bwateke erogoma.

 

Tokaigatera bono obokima egesamaro, no omong’ina Nyakerario okona gototiotereria.

 

Omong’ina agatotebia, “Bobege moigote kegima. Ninwe abamura mogokiina.”

 

Motanya akamotebia, “Omwanchi, gaki inche no omogaka omogotu tari bono ngokina. Nche nigo nkoria bosiniini.”

 

Intwe abamura tokagenderera. Tokabosimbaga buna abana be esekenderi enchara eitete ekero abarimu barire chibesa chibwenerete kogorera abana endagera eisaine. Nainche buna konye narure Mache Ng’umbu ase ntari konyora bosie bwa bori, nkaigatera. Mbwata obokima, mbobata ekegusii, mbwaterania enyama ne chinsaga, mbeka gochia monwa. Kobogotirimboka, ng’iyereria na amabere amaruranu.

 

Ekero twakoora bwonsi korwa ekee omong’ina akarangeria omosubati ore komokonya koruga arete obonde.

 

Nkamokania, “Yaya, Mami, inche naigotire.”

 

Omong’ina agatebia omosubati, “Retera Mogeni bono Omoamerika ere tiga ange onarire ebitoche bia Mache Ng’umbu.”

 

Mogeni nere agakana, “Mami, yaya. Nabeire buna riria nabete.”

 

Ngachia koigwa igo, ngaseka, ngaseka, ngaseka, mbaka ngaturungana. Naende ngaseka, ngaseka mbaka nkarera. Naende ngaseka, ngaseka, yaani ngaseka mbaka bagakaga nabeire richara. Chimbaru chikang’atia.

 

Konakora goseka kamoboria, “Mogeni, ng’ai omanyerete omogano oyio?”

 

Mogeni akaboria, “Mogano ki?”

 

O Motanya na Abanyaribari, no omogano oyio no oyoseito, aria Nyamira, Bogirango Bosongo.

 

Seito Makairo omogaka oyomo narenge ore korokwa Gesokera Nyandagesera bwanchete enyama mono. Rituko erimo omogaka onde ore korokwa Nyakundi akamochiika ekegeni komana chiombe. Ekero baika aroro, Gesokera agasokera endagera mbaka agasinywa koimoka. Endagera eyio aigaterete egachaka komobeta korwa nda. Agachaka gokema na kwana buna emori yarire chibando chinyinge ekooreka. Abamura makamobogoria gochia sukunyoma bakamwengera esabuni aroka endagera abanto batano bararie baigote.

 

Abagaka ba seito bagasoka ase ogochika omonto okobasareria obogeni. Kobairana nka Makairo bagatiana buna onde tabase gochika omogaka Gesokera gochia kegeni kende.

 

Naende rinde bono Makairo gekirete tokoigwa buna omogaka onde okorokwa Ndemo nere orangerigwe ekegeni. Agaetia abagaka bande tachiika Gesokera. Korende buna seito Makairo totari gokiria ng’ana, omonto akamonyerera Gesokera. Gesokera akagenda bw’ omogaka Ndemo akanyora abande no bare bakobanga esabaria. Akababoria gose mbamoire obogeni nere.

 

Ndemo kamokania, “Yaya, Gesokera, nkwaretete obosoku obonene o mosubati o Nyakundi. Aye ne esese embe etari bogeni.”

 

Gesokera agachaka gosorora buna omwana obwatirwe na amamocho ogosorora taitwa, “Yaya, gaki Tingonkora bo kabere, Ndemo.”

 

Ndemo akanga pi, “Yaya! Orabaise gochia gokwera aria oboko otoreterere.”

 

Gesokera agatugama nse na gosorora mono, “Gaki, gaki, gaki, abagaka baminto timontiga.”

 

Seito Gusii monto mosacha gocha gotugama nse na gosorora buna omwana nabo ogokaga buna na amaene agoteba. Abagaka bagancherana komoira oboko bwa Ndemo aaria Nyamusi Etari Bitutu, Bigirango Irianyi.

 

Ekero baigete ekegeni endagera ekarosigwa enyinge. Kobakona koragera botuko rende seito Gusii sitima etaiyo mono ne ebibeya togwokia. Bakaragera igo onde tachia korora Gesokera gagosokera naende.

 

Akaigatera bono naende mbaka enda ekaba buna omonyocho. Ekero yachaka komoresania Gesokera akaimoka korwa nyomba akagenda gochia gesona. Agetoora  ebwobi okonagokema.

 

Omosae oyomo bw’ ekenyoro ekio okorokwa Momanyi akamorora. Akamoboria, “Omogaka, naki imbuya okare bori?”

 

Gesokera akamotebia, ogotogota but ekeragita, “Nabeire buna riria nabete.”

 

Momanyi akamoboria, “Naki kwabete?”

 

“Nabeire buna riria nabete.”

 

Momanyi agakaga Gesokera no oborwaire akabwate. Akaminyoka gochia eero ase abanto bare kona gosiba ekegara na gotengera chisani chia Christopher Monyoncho omwana bw’ Araka, riyo ri ebasweti.

 

Momanyi gateba, “Mochumbe, kararimia ekenada.”

 

“Yaa, Momanyi bono ne ebirecha bikoriete? Ndimie ekenanda abageni bagotenga? Tiga esani eye eraera.”

 

“Yaya, yaa, Mochumbe, oMogeni orwarire.”

 

Mochumbe akarimia ekenanda.

 

Momanyi akaboria, “OMogeni orwarire aa ogoteba buna obeire buna riria abete. Ng’o obwate eriogo riaye?”

 

Omogaka Ndemo akaminyoka gochia isiko ogoteba, “Obe! Obe! Obe! Oyio eriogo riaye ntomanyete. Mwengere esabuni Omo.”

 

Bakengera Gesokera esabuni. Bakamobetereria keero buna omwana ekengwerere bwangire konya erongori. Akaroka chinyama echinde chingima atatakuneti akamanya gocha koba buya.

 

Korwa erio onde tachia komochika Gesokera gochia bogeni bonde. Ekero seito Makairo twaigwete omogano oyio, togaseka. Gatwarageire twaigotire togachaka togoteba, “Nabeire buna riria nabete.”

 

Tomanya goseka bono buna amachore arorire chibando. “Ha ha ha ha ha ha ha! Nabeire buna riria nabete.”

 

Na seito Gusii bono buna tonarete goakaakania amang’ana buna embori ekonia egesero, ani amang’ana aikire Nyaribari sobo Mogeni.                                               

Edwin bw’ Okong’o, Omosani omonene bwe Ekegusii nere omoriki bwo Omwana Oito o Mache Ng’umbu                                                                                                     

"Esese Isiko, Ekemoni Nyomba"

 

Chimbera chie chisese, Cambria Cemetery, California. Flikr/Wonderlane

 Omoriki ne Edwin bw’ Okong’o, Omwana oito Mache Ng’umbu .

Minto. Mwanyagetinge. Nyaituga, omwana o baba. Tegerera ngotebie rero amang'ana araa amakong'u pa!

Kare, kare riria chingoko chiagakamirwe omogaka narenge seito Makairo, aria amaninko Gusii, ang'e ne echiro eria yakumete mono Gusii ekorokwa Kebirigo.

Onye gokagete buna oyo no omogano igoro buna seito tware konywa erongongori etainekiri, kana koganya. Gose onye gokagete ngogotebia nde buna seito tware gokama chingoko, kana gokenderera agwo ekiiriri kio omotembe. Tindi gwatora bobisi buna seito tware gokama chingoko ekero oboremo bwabete chincherere totabwate ase nonya n’ embori okoriisia.

Oyo no omogano bw' omogaka oyomo obwate chisemi, korende ekero twarenge abana nigo tware komosekerera. Omogaka oyio nigo are korokwa Mogaka. Magoroba iga ko omobaso okendire nigo agaterekire ebusaa yo obori na abasani baye. (Tari eye ye chibando rero nonya na abaisia abasiniini bakonywa). Kobasiibire ekegara ne chinkore bakonakoererania buna abana ba ng’ina omo, nigo bagaterire emeino emiya. Oyo nanchente ginkonakobategerera nigo orenge korokwa “Mosaiga.”

Siberia ong’e, aye siberia ong’e, mosaigaa

Ayeee, aye mosaiga

Toa monto, mosaiga toa monto okobayabaya

Ayeee, aye mosaiga

Kobasiibire bono Mogaka orangeria omong’ina oye ore korokwa Mong’ina. Korende tare komoroka Mong’ina. Nigo akamorangeirie na amasikani.

“Aye, baba yane, mosubati on Bosire,” Mogaka arangeria.

“Ee!”

“Gaki tomentere a mache a morero.”

Mong’ina nere okonyora erio konye orasiibire ekemite na abang’ina abaamate kobakona kogosoria na goteera.

Rero ndero, toe

Echae ya morero toe

“Mosubati o Bosire naye gaki,” Mogaka omotebia kagoseka. “Ntomanyete buna tari chae ya morero mokonywa agwo chikoni.”

“Nyakerario,” Mong’ina arangeria mosubati oye.  “Ereria iso amache gose natotigane tonywe echae eye Kemuma arosia.”

Abang’ina na abagaka bonsi baseka mono mbaka baturungana. Mong’ina nigo arenge omong’ina bwamaseko mono. 

Nyakerario kabamenteire amache, abagaka basiiba ake igo. Nabo rinde kware konyoora abasae bande buna oyomo ore korokwa Mong’are bakonywa bwango, bwango ne endamwamu. 

“Aye omoisia oyo Ratemo gwatindire,” omogaka onde ore korokwa Nyambati amotebia.

“Ee, tiga agende,” abagaka bonsi bancherana.

Mong’are o Ratemo gachiire bachaka kogamba buna are omonywa bobe.

“Mbuya twamoseria,” Mogaka ateba. “Mwaigwa bono buna rinde anywa akooga bogakia?”

“Ayio na amake,” Nyambati ateba. “Rinde momura one Momanyi taigwa ‘esagasaga’ botuko agachia gosoka akamonyora araire omochachaku ime?”

“Naki amokorete?” omogaka onde akaboria.

“Gaki Momanyi one ne emechando. Nigo amokururete akamobeka as konye arorire chinsanako magoroba.”

Bonsi, abagaka, abang’ina, na abana bagaseka mbaka bagaturungana. Omomura oyomo ekegara gekamotokeria. Tamanyete buna ka abagaka bakogamba nigo okoratiga konywa gwategerera.

“Yaa naye karwe aa tonara egento eke kia abagaka,” Nyambati akamotebia.

“Tiga bagende bonsi,” Mogaka ateba. 

“Ee, tiga Mochumbe ache atwaterie chinko botaraira,” Mong’ina akabatebia.

“Yaya,” Mogaka agakana. “Tumia ebiemba. Egento eke Mochumbe asiiba kiamokorire richara arabaise gweaka egesire.”

Mochumbe na bagisangio baye bakagenda gochia saiga gotegerera eretio “BPC Swaeri Sabesi” (BBC Swahili Service). 

Abagaka bakorora buna abasae bachiire bagatoma Nyakerario gochia kiage abaretere ebuga. Bagatiera na konywa. Mogaka agaansa go kwana amang’ana onde ataare komanya engencho yaye.

“Esese isiko, ekemoni nyomba! Esese isiko, ekemoni nyomba!”

Inche erio nigo narenge omwana omosiniini. Tinamanyete eng’encho ye, “Esese isiko, ekemoni nyomba.” Korende ngakina, ngakora esekenderi ngacha mache ng’umbu, Amerika.

Gaki tiga mbatebie buna Abamerika nigo banchete chisese ne ebimoni mono. Okonyora ekemoni keroseirie nyomba kemenyete buya, nonya mbeba nchiyo kebwenerete goita. Endagera nigo gekogorerwa enga ebisuguti kiabekerwa na amabere. Nonya nase gekobeka echabu go kiabutiarire nigo kebwate abanyene bana goitora. 

Ne esese nero nigo yanchire mono. Emenyete nyomba, egoikaransa esoba seti igoro yarigereria etelebiseni na abanyene. Esese ya Amerika oise konyereta seito Kenya nigo erakwe bwango mono. Nyama mbese sese ya Amerika terikoria. Tenga buna Ondieki yaito yakaminyokirie egesusu gose egechure yabwata twaria, twanyea amauga. Buna ekemoni kia Amerika, esese ya Amerika nigo ekoroserigwa endagera special ekogorwa korwa etuka. 

Tiga bono naende, Omogusii ominto, ngotebie egento kende kiamaseko. Abamerika naende nkoratwara bare amasindano korora buna ning’o obwate esese gose ekemoni egeseera. Amasindano ayio ataraika nigo bakoira chisese ne ebimoni baakana chibesa biasibigwa na konintwa chinchara. Omobui bwa amasindano nigo akoegwa egekombe buna keria abagosoria bakoeegwa. 

Nimanyete ngoteba ore buna, “Etwini gaki naye! Esese eegwe egekombe kiamaminyoko?”

Maene pi ndie esese, tindigokong’aina, Nyaituga o baba. Boria onde bwensi omenyete mache ng’umbu.

Chisese ne ebimoni kobiarwarire Abamerika tibari gotiga bikwe. Nigo bakobiira chinyagetari chi ebimoni ne chisese. Nimanyete Omoamerika oyomo oakanete $4,000 (Ksh. 300,000) kobaara esese endwaire. 

Esese koyangire kobwena nigo bagokora egento gekorokwa, “Putting it to sleep” – bakonyebeta esindani yakwa ng’ooora. Koyakuure, banyeira ase akorokwa, Pet Cemetery, ase chimbeera chie chisese, ebimoni, ne ching’iti chinde Abamerika batugete nyomba chigotindekwa. Kobanyetindekire nigo bachachana na gwechwanachania buna omoibori okwereirwe no omwana. 

Esese isiko, ekemoni nyomba.

--omoerio--

Edwin Okongo nigo are Omoriki Omogeni ase Gusii.com. Ka moranche, motarere ase ewebusaiti yaye aaria ase Ourmaninamerica.com

Edwin Okongo. Egasi engiya ase Abagusii na Kenya Engima

Edwin Okongo nere omoriki omonene bwe e bulogi ya Mshale naende omoriki bwe e bulogi yaye omonyene ya Okongo's Policy. Nigo asomete California State University aaria Hayward amo na University ya California aaria Berkeley. Nigo are oyomo bwa Abagusii bari barikire amangana amaya naende amange sana igoro ya Gusii na Kenya. Ka moranche, soma amariko aye ase chibulogi echio nabatebirie igoro. Imbuya mono Okongo ase e vidio amo na egasi engiya.

1

Edwin Okong'o said...

Nagokire mono korora buna Abagusii banchire amang'ana nkorika. Gaki batebie basome omogano oyo. Nigo nanyorigete Ekenyamorero korende nimbegete omoino bw' Ekegusii chisokoro chiagaterire ekero chikonywa ebusa.

Naende evidio nere narosetie korwa inka Kenya -- Kisumu, Migori, Nairobi, Gusii -- ekorokwa "Kenya: Sweet Home, Obama." Nigo nagendete nka ngakwana na abanto abange baka abang'ina bagontebia buna, "Tiga tokoe chikura."

Reply 10/30/2009 at 06:03 AM

2

Jared Nyaberi said... 

Engaki ya Omotienyi o Gatano(Amaumuntia), nigo nare kona komongera eintaneti. Inkagoogle erieta ria "Gusii Highlands." Ninki nanyorete? Edwin Okongo ase Okongospolicy.com. Edwin narigete omogano bwo ogokina Gusii. Akoeresa buna akinerete obotaka. Inche nigo nasomete omogano O Edwin inkarora inga nigo twaiboretwe nere. Obotaka. Abatata bagasira. Gotatwara efisi. Gotatwara Kende. Gocha Amerika na gokora chigasi chinkongu erinde tokonye abana baminto inka. Edwin Okongo tari kwoboa korwa omogano oye buna akinete. Evidio yaye arosetie ekero agenda inka bwango iga nao ere igaa. Ka moranche rigereria omogano bwo omwana omino. Imbuya mono Edwin ase obosemi.

Reply 11/02/2009 at 03:33 PM