Gusii

Abagusii Culture And Customs CXI: Bono Amaiga Y' Omogaka Ninki?

 

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 25, 2013.

 

Abagusii Wisdom Revisited

 

Aya amwabo aya:

Abagusii Customs XI: Bono Gesarate Ninki?

Abagusii Culture And Customs XXVII: Emegiro Y' Ekegusii [ I ]

Abagusii Culture And Customs XXII: Omogusii The Physician, Part II

 

Omong'ina magokoro baba ominto nantebetie buna abwo ase chingaki chia kare kare, amaiga y' omogaka narengeo. Bono amaiga y' omogaka ninki? Naende nabo oraborie. Magokoro nigo antebetie buna ase amatuko amakoro, nigo abagaka bare koriseria chiombe chiabo ase oboamo, naende nigo chiare korara ase ayamo.

Nigo baba antebetie buna nigo abagaka aba bare korosia egesa gekorokwa gesarate, erinde babera na korara aroro. Bono abaminto manya buna gesarate n' ase abagaka bare komenya, ayio arenge aare na sobo, na nigo bare kong'anya ne chiombe chiabo.

Ase boigo, nigo omong'ina antebetie buna abang'ina mbarenge kobera gesarate. Yaya. Abasae n' abagaka, nabwo boka barenge kobera aaiga gesarate. Bono ekero omong'ina arenge koigwa amaiga y' ogokwania omogaka oye, nigo omong'ina oyo are kwebwatesia, orosia endagera egotonontera, buna obokima amo n' ching'eni chiri omogaka oye ancheete.

Tingocha kona kobeera nyombaa nche bweka: Omosubati nyakieni nkorengereria are, okweboria buna n' chinyeni ki gose, agocha koiyekera omogaka oye, erinde amoirere aaria gesarate. Ase Abagusii, amaiga y' omogaka narengeo.

Korwa abwo, omanya gwetema igo, goika gesarate na kobairera endagera eyio eng'ansu. Bono omong'ina oyo gaikire abwo egesarate, nigo abagaka aba bande bare komanya buna omong'ina oyo nigo are n' amaiga y' omogaka oye, bamanya koa omogaka bw' omong'ina oyo ribaga, erinde ogenda bwoye!

Kobwatekana n' omongina magokoro baba ominto, aya naro arenge gokwanerwa buna amaiga y' omogaka, n' Abagusii abakoro. Abaminto, obo nabwo obosemi bwaito bw' Ekegusii ase rero. Monywe mache maya, and thank you for listening.

Abagusii Culture And Customs CX: Bono Okobereka Ninki?

 

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 17, 2013.

 

Abagusii Wisdom Revisited

 

Aya amwabo aya:

Nigo Akwegambia

Abagusii Customs XV: Amasabo Ye Ribina

Abagusii Culture And Customs CIX: Yaya Tata. Nche N' Abasubati Booka Ntagete Togosianyane!

Omongina magokoro baba ominto nantebetie buna Abagusii ntwabwate amarieta gete twarenge gokwanera ase chingaki gete. Ase omorenganio, amarieta narengeo atato arenge gokwanerwa ekero omosubati abwate oborito. Nigo magokoro antebetie buna amarieta ayio nigo are:

Kai tata! Ndoche egasi negendererete. Aaiga, abasubati batato baberekire.

Gochia bogima: Aiga nekero omosubati ore morito agokwa ekero akoibora, nabo omwana oye arabe moyo, gose nere akwe. Omwana nere okomoita [ Nigo omosubati oyio achite bogima igoro botuko ].

Kobina: Erita eri nigo riarenge gokwanerwa ekero omokungu ori ore morito achakire koromwa, erinde aibore omwana [ Nyaboke nigo achagete kobinwa  kendabu ].

Kobereka: Aiga, nekero omosubati abeire morito. Ase boigo, nigo omongina antebetie buna erieta eri ngokwanerwa riarenge ekero chibando mogondo chiabeire  gosambwa, gose ritoke ekero rire mogondo riarosiri ritunda, nigo togoteba buna riaberekire [ Kemunto  nigo abereka bwango ].

Bono aya naro amarieta aito atato ase rero, korwa ase magokoro baba ominto. Mbuya mono and thank you for listening.

Abagusii Culture And Customs CIX: Yaya Tata. Nche N' Abasubati Booka Ntagete Togosianyane!

 

Buna Twakabeire  Na Petronillah Ogoti. Gusii.com Proverbs, Culture And Customs Editor. Rigwata [ April ] 14, 2013.

 

Abagusii Wisdom Revisited

Aya amwabo aya:

Bono Chinkomoro Ninki?

Abagusii Culture And Customs CVIII: "Motembe Nsago Nchiao"

Abagusii Culture And Customs XXXIX: Emeyega Ao Ao Y' E Ekegusii

Omongina magokoro baba ominto nantebetie buna Mwanyagetinge ntwabwate ebinto gete twarenge kwegena, ase obomenyo bwa kera rituko. Ase okwegena ebinto ebi, ntwe Abagusii tokabikora ase amatuko amange, goikera bikaba chingencho chi' ekemira giaito.

Bono chingencho echi nchirichi? Nabo oraborie. Ase omobwekano:

[ I ]. Chingoko chiamonyereranire: Oise korora chingoko chikomonyererana gose buna chiri chikoamba goitana, nigo bare goteba buna omogeni nchera are gocha ase omochie oyo. keri keri iga, omogeni goikera arenge gocha ase omochie oyo.

Nche nabo ntagete iga. Gosianya abasubati abange rimaambia echuni, aaria Keumbu Town. Rero n' ebisio bioka. Photo na Petronillah Ogoti, Gusii.com files.

[ II ] Ntakonyora kende niimbeka mboto: Ekero okoragera, obeke endagera omonwa oyomo, omogeni amanye gocha, nigo bare goteba buna oyo ocha onyora gokoragera nigo are kogokwana buya. Ase eng'encho arenge kogokwana buya, nakio anyorera endagera yabekirwe emesa igoro!

Korende oise gokora endagera korwa emesa igoro, omogeni amanye gocha akong'onte asoe nyomba, nigo yare koba buna omogeni oyo nigo arenge gokogamba bobe! Eke nakio kiagera endagera yaera, omanya gocha.

Ekerundu nigo kiarenge omote bw' engencho ase Abagusii, ekero ki' embura enyinge. Omote bw' omoroka oro rende?  

[ III ]. Motagotebia omogaka Maroko atandore ekerundu? Ekero embura yarenge gotwa enyinge, nigo ekerundu kiare korigigwa giatandorwa gati gati erinde gekubie embura nke!

[ IV ]. Goika kware kobwata omoroka: Omonto orenge gotwara obokong'u ekero agochia gwekonya, nigo arenge kobeka rito rio omoroka omotwe igoro, erinde enda yaororoba, omanya gwekonya buya.

[ V ]. Goika okwane amarieta y' abana bamino bonsi: Omonto ekero are gotwara ekiegeso nigo are gotwa ogoto kw' embeba erinde obeka obosio igoro (forehead). Gakorire iga, nigo ekiegeso kiarenge gosira. Naboigo ekero ekiegeso giakorire nigo kware gokwana amarieta y' abana bamino omoyo ime bonsi pi, korwa abwo ekiegeso kiamanya gosira.

[ VI]. Tiga goitera amache borere na gosaria riiyo: Omonto ore goitera amache borere ekero araire nigo are gotebigwa arine omote omotambe igoro erinde aitere amache korwa omote oyo igoro kamiameti, erinde omanya goika. Aise gokora aya nigo are gotiga goitera amache borere.

[ VII ]. Ekemoni giatambokire rikori: Oise komanora gochia esabari erinde onyore ekemoni ekemwamu kegotamboka rikori, nigo yare gotebekana buna amang'ana amabe ngocha gokorekana arenge. Ase Omogusii, ekemoni ekemwamu nigo kiarenge koba ekemanyererio ki' obobe.

[ VIII ]. Nche n' basubati booka ntagete togosianyane: Maambia echuni, oise komanora kogenda ase gete, omanye gosianyana n' omosubati, nigo yare gotebekana buna ebio nebisio. Korende kwarenge konyora omosacha, nigo kware gotiga kogenda esabari eyio, ekiagera nigo kwarenge gocha koumera amang'ana amabe.

Nonya n' abaibi simbiri mbamanyete!

Tari igo rioka. Mono mono, ekero abaibi simbiri barenge komanora kogenda koiba, bamanye koumera omosubati, nigo bare goteba buna mbare konyorwa ekero bakoiba! Korende abaibi aba bare koumera omosacha nchera ekero bamanoire gochia koiba nigo bare koirana ekiagera nigo bare gochia konyorwa ekero bakoiba.

Echi nachio ching'encho nke chi' ekemira giato gia kare, buna omongina magokoro ominto antebetie. Mbuya mono and thank you for listening.

Abagusii Culture And Customs CVIII: "Motembe Nsago Nchiao"

    

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 11, 2013.

 

Abagusii Wisdom Revisited

 

Aya amwabo aya:

Abagusii Culture And Customs CIII: Bono Ebigara Ninki?

Abagusii Culture And Customs LXXVIII: Bono Omorominta Ning'o Ase Omogusii?

Abagusii Culture And Customs LXXIX: Bono Okoremera Ebiranya Ninki Ase Omogusii?

 

Abagusii abakoro ntwabwate emete gete, eyio yarenge eye eng'encho ase ekemira giaito. Ase omobwekano, omogaka sokoro ominto nantebetie buna omote bw' Omotembe nigo orenge oyo bwe chimuma!

Omotembe n' eriogo ase Mwamogusii. Onye kwarenge gotaka obwenigwe korwa ase oborwaire bwe chinsago, goika kwarenge gotenyera Omotembe chinko! Below: Omotembe. Photo na Petronillah Ogoti, Gusii.com files.

Nigo orenge omote bw' amang'ana amakong'u.  Omotembe noro Abagusii twarenge gotumia, ase okoria chiira.

Nigo sokoro antebetie buna Abagusii nigo twarenge komugania Omotembe, twatiana, erinde twateba buna eyio ne emuma twaria. Komenta n' okoria chimuma, omogaka nigo antebetie buna Omotembe nigo orenge omote bwe eriogo.

Omotembe ngotenyerwa orenge chiinko

Ekero chinsago chiare koria omonto,  nigo arenge kogenda otenyera omote oyo bwo Omotembe chinko, erinde oyotebi buna "Motembe nsago nchiao". Korwa abwo, otiga chiinko echio ase Omotembe na koirana kenyanyuma atari korigereria magega! Gakorire boigo, obwena korwa ase oborwaire obo bw' chinsago.

Nigo orenge korenda abana tibasiarerwa ebibiriri!

Ase boigo, omogaka sokoro ominto nigo antebetie buna Omotembe nkobachwa orenge, oroisigwa ebibekerero ao ao buna orotuba, ekonu, amo n' ebinto binde ao ao. Tari igo rioka, sokoro nigo atebete buna chintentere chiaye nigo chiare gosoneranigwa ase eyanga y' omwana, erinde tasiarerwa ebibiriri!

Omote bw' omotembe. Omote orenge oyo bwe engencho mono kegima ase Omogusii. Obo nabwo obosemia bw' ekemira korwa ase omogaka ase rero. Chingaki chingiya and thank you for listening.

Abagusii Customs CVII: Bono Chintanda Ninki Ase Ekegusii?

 

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 10, 2013.

 

Abagusii Wisdom Revisited

Aya amwabo aya:

Ekegusii Months Of The Year

"Bono nigo Mwatigete Korika Ase Ekegusii?" Omogaka Onchiri.

Abagusii Culture And Customs XXVII: Emegiro Y' Ekegusii [ I ]

Ase amatuko amake aetire, omogaka sokoro ominto nansometie igoro y' chintanda ch' ense. Bono Chintanda ninki? Nabo oraborie. Omogaka sokoro nigo atebete buna ense engima nigo ebaganire gochia chitanda gose chimbega [chinsemo ], echio chire inye.

Ase ekenyamorero, nigo chikorokwa 'directions'. Inee nochimanyete ase Ekegusii egeitongo, chitanda echi? Kobwatekana na sokoro, chintanda echio nigo chire:        

1. Sugusu: North. Omambia nigo arwete aaria Nyamira, Bogirango Sugusu.

2. Irianyi: South. Bisieri nigo anywometwe gochia aaria Etago, Bogirango Sugusu.

3. Mocha: East. Nigo agorete oboremo aaria Bogetutu Mocha.

4. Bosongo: West. Oyio nere omongina omonene ase Bogirango Sugusu eng'ima.

 Obo nabwo obosemi bwaito ase rituko ria rero, korwa ase omogaka sokoro ominto. Mbuya mono and thank you for listening.