Gusii

Emegano Ya Abagusii LXVII: Amamocho Amange Mono Ase Okaobiri Komena Omote, Aaria Nyanchwa!

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 24, 2013.

 

Abagusii Wisdom Revisited

 

Aya amwabo aya:

Emegano Ya Abagusii XV: "Nigo Iso Ateba, Oire Omogeni Nka, Nyoko Amonyenyere Etwani Eria Enene" Ogasusu

Emegano Y' Abagusii XXXII: Bono Nyagaka N' Mokaye Nigo Batigarete Batari N' Kiamboria!

Emegano Y' Abagusii LXVI: Semi Tichingana Nguru, N' Obong'aini N' Obuya

Abwo kare kare, ase ekenyoro kia Nyanchwa, ebigoro mbiarenge aroro. Bono ebigoro ebi nigo biagiteire ime y’emete emenge, eyio yameete naende yarenge kororekana buya. Abamenyi be ebigoro ebi nigo bamenyete n’ omogoko amo n’omorembe omonene.

Emaambia eyemo, abanto be ekegoro ekemo bagakumia ase aya baroche. Ase ekegoro ekemo, omote norenge oyomo bwamete na koba omotambe kobua emete yonsi pi ase ebigoro ebi bionsi biabebekaine aaiga.

Omote oyo ogakina okaba swanya

Ebisabo bi’ omote oyo nigo  biasabogete, goikera bikaama na koba ebitambe mono ase chinsemo chionsi pi. Chinsagi chi’ omote oyo nigo chiarenge buna emete ende, eri yamete aiga ase ekegoro eke gose ebigoro biri binde biabebekaine aiga.

Ase boigo, amato y’ omote oyo akaama na koba amanene kegima, goikera agatanga omogaso togoika ase amaraba gose obonyansi. Omote oyo okairera ekiriri ekenene gocha aiga, goikera ekegoro ekegima omosunte okabwata omonene.

Bono ebimeri ao ao bikaba mbiri komera na koama ase eng’encho mbiare konyora omogaso erinde obimente chinguru biame ase botoereru. Ebimeri ebinge bigakwa, goikera  egeateko gi' enchara gekarorekana koba ang’e.

Nonya nabo igo, ching’iti chi’ orosana chirochio nchibwate obosubore n’ omogoko ekiagera nigo chiare koria amato aya, ayio arenge gosaboka bogakia. Bono Abanto ba Nyanchwa bagatwara obwoba n’ omote oyo.

Bakanya korigia chinchera ao ao barayogechere, ekiagera omote oyo konye obeire omonene kerage. Abamenyi aba bakaigwana bayogeche gose mbache gokonyeka, nyuma enchara etarabaita korwa ase ekegoro eke.

Bono emaambia eyemo, bagaturana, na gochaka koyogecha. Bakayogecha bokaira na koirana riakagororoba chinsobo, ase baragerete na gotimoka korwa ase emeremo emekong’u bakorete rituko rigima.

Kai! Mote oyo tori kororekana gose nogechetwe.

Aankio yaye, bakairana kogenderera kogecha omote oyo korende bagakumia ekiagera banyorete omote oyo naende bwamire torikororekana gose nogechetwe rituko ria igoro yaye! Bagaichana korende bagachaka koyogecha.

Abamenyi ba Nyanchwa Hill: Ntwe nigo totagete kobutora omote oyo, erinde toagache chinyomba ase tokomenya. Korigereria korwa Kisii Town gochia aaria beautiful Nyanchwa Hill. Picture na Petronillah Ogoti, Gusii.com files.

Bono ekero bwairete aba bakairana chinsobo buna yarenge botambe, bakaboka rituko rinde na kogenda ase omote oyo na konyora naende bwamire anene kobua buna bayotigete! Bagakumia na goichana mono kerage.

Aya akaba kagokorekana ase amatuko atari make, goikera engaki baruseti moyo buna omote oyo tobwenereti gokunwa. Bagateba buna nigo ogotigwa igo, bwame goikera kaa ase oratigere kwama. Bono buna babwatete amakere na gotenena bayosonchete, Okanyoni oyomo akairuruka goocha ase barenge.

Okanyoni nabwate eng'ana

Okanyoni oyo nigo arenge omosiniini mono batare koyemanya buna n' Oknyoni ki orenge. Okanyoni oyo akabakwanera korende as’ eng’encho aba barenge n’ obororo obonge, tibachia komokwanera ekiagera nigo bayechayete buna tayarenge n’amang’ana arabakonye nonya n’ asinini.

Korende Okanyoni ere tachieti korusia moyo kobakwanera. Akagenderera kobatebia buna "Timoseka. Aya nkobatebia nigo are y’e ng’encho na nigo arabakonye ase anene kegima motaregokagera. Nche ninde n’ obokonyi n’ obobisi bw’ omote oyo obanchandire emiaka emenge"

Bono abanto aba bagakumia na gokira erinde bategerere aya Okanyoni oyo abwate. "Okaobori nere obanchandire ase amatuko aya onsi. Ekero mogokora kogecha nigo Okaobiri arenge gocha, omena ase mware gwatia erinde omote oyo osaboka obotuko obogima! Nigo Okaobiri atagete omote oyo onyakoba aroro ekiagera nigo okomokonya  kwebisera ababisa baye erinde obatwara na konyora endagera yaye yak era rituko"

Okanyoni akagenderera okobatebia abamenyi b' Nyanchwa buna  "Ekero mwainokire, nere buya  mwatiga ebisire aroro na nigo mogwatia mwatiga aria ase atieriri arori igoro, erinde kogocha komena omote egesire kenyenye oromeme rwaye"

Ekero Okanyoni akoora goteeba amangana aya, abanto ba Nyanchwa bakaigwa buya na koirana chinsobo. Kobwakia emaambia yaye, bagacha n’ ebisire bitieriri bigaika na bagachaka goatia omote oyo ong’ana swanya.

Amamocho mono ase Okaobiri komena omote. Bono onyenyire oromeme rwaye rwensi pi!

Ekero riagororobete, aba bagatiga ebisire ase omote naaria ase atieriri akaroria igoro erinde bakagenda chinsobo. Buna botambe ere, Okaobiri agacha na kong’ea komena omote oyo. Keri keri, Okaobiri agachacka komena buna botambe na konyenya oromeme rwaye na korobutora!

Okaobiri akaigwa obororo, n' amanyinga agaiteka atari make. Okaobiri korora iga, agatiachoria n' chimbero chimbariri, tachia koirana rinde aiga. Korwa abwo, mote oyo tochieti gosaboka. Abamenyi b' Nyanchwa bakayogecha igo, goikera okagwa nse, n omogoko ogaichora ase abanto abwo bachagete gosimeka chindagera chikaama.

Emegano Y' Abagusii LXVI: Semi Tichingana Nguru, N' Obong'aini N' Obuya

Buna Twakabeire  Na Petronillah Ogoti. Gusii.com Proverbs, Culture And Customs Editor. Rigwata [ April ] 15, 2013.

 

Abagusii Wisdom Revisited

 

Aya amwabo aya:

Emegano Y' Abagusii LXV: Bono Korora Okambori, Okabwe Agaaka Ekerundo Na Gotwekera Rinani Ime!

Emegano " Abagusii XXXVI: Naende Ogasusu N' Omansamu Baetanire!

Emegano Y' Abagusii XLII: Bono Ogasusu Oansire Oboonchoreria

 

Abwo kare kare, ase ekenyoro gi' Kiang'ende, chimbori ibere nchiarengeo. Embori eyemo nigo yarenge enene, naende ebwate chinguru chingana swanya. Nonya nabo igo, embori y' kabere nigo yarenge ensiniini, naende etari na nguru nyinge.

Embori eri' enene, eyio egwesigoria gocha. "Goika ntamboke ritangani kogenda bwone aaria Kiang'ende, ekiagera ninche omonene" Nabo embori entagani yachagete goteba, egwetunkwaria. Picture na Petronillah Ogoti, Gusii.com files.

Bono ase ekenyoro eke, oboraro  mbwarosiri, obwo bware gotamboka gochia ase ekeng’umbu kende. Bono rituko erimo, chimbori echi gichigotamboka oboraro obo bwarenge obogote, chikaumerana gati gati y’ oroche!

"Bono naki togokora?" Embori entangani egatebia eyamwabo. "Irana gochia ase kwarwa, erinde nche ndatamboka". Embori yakabere egateba ekare gokana nakoboria embori eri yatanganete eirane. Abwo abwo, embori eria entangani egateba buna nero yarenge enene.

Bono buna yarenge enene, nabo ere buya eye enke eirane korwa ase yarwa korwa erinde eye enene eete. Embori eri yakageire koba ensinini ekarengereria na goitona amang'ana aya na goteba buna "Rika ri’ okoirana korwa ase narwa, tiga ndare inse, erinde ong’ete igoro. Korwa abwo, nainche manye kogenderera n’esabari yane".

Embori eri enene  egaitaba na korora buna igo mbuya. Embori eri enke ekarara inse, n' eye enene egaeta igoro  erinde kera embori ekagenderera n’ orogendo rwaye.

Obong’aini n’obuya

Emegano Y' Abagusii LXV: Bono Korora Okambori, Okabwe Agaaka Ekerundo Na Gotwekera Rinani Ime!

  

Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 7, 2013.

 

Abagusii Wisdom Revisited

Aya amwabo aya:

Emegano Y Abagusii XXI: Omoibi Egiata, Aaria Iruma.

Emegano Y' Abagusii XXXVI: Bakungu Mbatakeiri Koria Amabere Y’ Eng’ombe, Emori Etaramera Amaino A Igoro!

Emegano Y' Abagusii XXXVII: Nigo Arenge Koinagera Endagera Igo....., Ekagera Bakamobaka "Nyanda Nene-Gesokera"

Abwo kare kare, emiaka n' emiaka, oronani ndwarenge aroro rware korokwa Gotinyango. Bono oronani oro rwa Gotinyango nigo rware oronene mono kegima. Aaiga ase oronani oro ime, Okambori nere nao amenyete mbarabare.

Okambori oyo nigo amenyete amo n' Okamanu oye. Okambori n 'Okamanu nigo bamenyete buya, nonya Okamanu oyo orenge ne egosori enyinge ase rinani eri ria Gotinyango. Ng'ina nigo are konyora chingaki chinkong'u, ekiagera Okamanu oye nigo agachire otiena ase ching'iti chi'orosana chiare, eyio etarenge buya.

Rituko erimo, buna ere botambe Okamanu oyo agasoa ime y' rinani ria Gotinyango gotiena. Ime ye rinani ime, Okamanu akagokigwa ne emete ao ao amo na amauga amaya arenge ye ekieni. Bono Okamanu oyo agatiena goikera akeenyora buna tamanyeti buna araike sobo gose nkai yare bono.

Aiga rinani eri ime, Okabwe nere nao arenge, eebisete emete ime. Okabwe oyo nigo atengerete gose nanyore kende aite, erinde gose nere abeke kende mboto. Okabwe akarora Okamanu na gochaka gokamerera amate.

keri keri, agachaka gochoba erinde abwate Okamanu, erinde arie. Riri Okabwe akare gochoba iga, Okamanu akarora na gochaka gotama ko tamanyete ase karwete korwa. Okamanwa akaminyoka na gotang'anera Okabwe oyo, aare mono.

Okamanu n' Okambori basoire nyomba. Nigo Okamanu aagete chimbero chimbariri, ogoita egekoe gochia nka. Mbarabare no oronani rwa Gotinyango. Enyomba y' Okambori. Picture na Petronillah Ogoti, Gusii.com files.

Aaria sobo Okamanu, konye ng'ina oichanire buna nkai Okamanu oye akare, korende nabo arengerereti buna ne rinani ime akare. Bono Okambori akaimoka na gosoa rinani ime kare ne chitang'utang'u, ekiagera Okamanu oye tanya koba engaki etambe atarairana sobo.

Obwango obwo obwo, ng'ina okare korora Okamanu oye okominyoka ne ekerundo korwa rinani gati ime. Okambori agaichana gose ninki kiabete. Chintunde nke igo, nario aroche Okabwe nere okominyoka korwa magega gose naikere Okamanu.

Ng'ina agaonchokera Okabwe na gochaka komominyoki. Okabwe korora iga, agaonchoka na gochaka korundoka korwa ase arenge erinde tabwatwa. Ng'ina ekero aroche buna Okabwe bwoondokire na kogenda aare, akairana gocha ase enka yaye, na konyora Okamanu oye oikire nka.

Aiga okambori akanyora okamanu orosete, n' egekoe agoita. Okambori akabwata Okamanu oye na komoira nyomba ng'ora. Okamanu akaruo akaira eira buna takogenda rinani ime gotiena ekiagera omanyire buna rinani ime na ababisa boka bagotoka.

Emegano Ya Abagusii XLIV: Nigo Ogasusu Asegasegete Okorigia Eng'ori Amotinganie!

 

 Buna twakabeire: Na Petronillah Ogoti. Gusii.com Proverbs, Culture And Customs Editor. Rigwata [ April ] 3, 2013.

Abagusii Wisdom Revisited

Aya amwabo aya:

Emegano Y' Abagusii XLII: Bono Ogasusu Oansire Oboonchoreria ...

Emegano Y' Abagusii XXXI: Bono Ogasusu Oakire Embuna N' Ekeriero Gionsi!

Emegano Y' Abagusii XXXIV: Nigo Ogasusu Atomberete Nse, Oganyete Gose Narare!

Abwo kare kare, ase ekenyoro ki' Omogogo Ogasusu narengeo. Bono Ogasusu oyo nigo amenyete amo n' eamate yaye. Rituko erimo buna botambe, Ogasusu akagenda gotwara agatiga abana baye magega aiga ase enka yaye.

Bono gakora gotwara na goika bwoye emorogoba eyio, akanyora eng'iti Eng'enda Nse yarire abana baye bonsi pi! Ogasusu agakumia na goichana kegima, na gosinywa buna ninki are gocha gokora ase engencho atigaire buna entakana aaiga mwaye.

Bono ngai eng'ori ere baminto? Ogasusu oyio okoming'iriara na gosegasega emesosino iime, korigia engori, erinde atinganie Engenda Nse.

Bono akaba okonya korera n' omoichano omonene. Keri keri, akaumerana n' eng'iti eye Eng'enda Nse. Ko basianyana iga, Ogasusu ere tachia komuorokia buna namanyete buna nere oitete abana baye bonsi.

Ogasusu agasasokera Eng'enda Nse eye, na koyetebia buna, "Gese n' Ogakondo tware gokomo, na komotebia buna aye naye eng'iti entambe mono aiga Omogogo kobua ching'iti chionsi pi. Korende Ogakondo tancheranete amang'ana aya ane".

Koigwa iga, Engenda Nse ekairaneria buna " Eee ninche omotambe kegima aaiga Omogogo na nigo koamba koreng'ana n' omote oyo". Abwo abwo,  Eng'enda Nse ekaraga omote orenge mbarabare aiga ase bateneine, orenge omotambe kegima.

Ogasusu nigo ating'anetie Engenda Nse ase omote oyo goikera ekooma pa pa pa!

"Tiga nsiberanie omotwe oo, omobere amo n' ekemincha kiao gochia ase omote oyo, erinde manye gotebia Ogakondo aiiche, erinde aenekie buna aye naye bweka eng'iti entambe ase ekenyoro eke ekegima ki' Omogogo". Ogasusu agatebia Eng'enda Nse.

Bono ere kaigwa iga, Eng'enda Nse ekagokigwa na gotebia Ogasusu amosibe ase obwango obwo. Chintunde nke igo, Ogasusu agasegasega, okorigia engori na gosiberania Eng'enda Nse eye ase omote gotira mbaka ekaba buna yatagete. Korwa abuo, Ogasusu akamotebia buna tiga aragenda gotebia Ogakondo ache koenekeria buna ere etambe.

Ogasusu akagenda, tairana!

Emegano Y' Abagusii XLIII: "Omorabera Omuuya Nigo Aetete Aange, Akaanga Korora Egasi Yane Engiya" Omoroisia Enyongo

    

Buna twakabeire: Na Petronillah Ogoti. Gusii.com Proverbs, Culture And Customs Editor. Egesunte [ November] 19, 2012.

 

Abagusii Wisdom Revisited

 

Aya amwabo aya:

Ekegusii Months Of The Year

Emegano Y Abagusii XXI: Omoibi Egiata, Aaria Iruma.

Emegano Y' Abagusii XXXIV: Nigo Ogasusu Atomberete Nse, Oganyete Gose Narare!

Abwo kare kare, emiaka n' emiaka, omoonchoreria oyomo narengeo aaria ase ekenyoro kia Nyamokenye, orenge korokwa Ondabu. Bono Ondabu nigo arenge konyora eng’eria enyinge korende tarenge koyegacha erinde ache gotumia ase engaki gose amatuko arenge bosio.

Engaki eyemo, enyomba yaye ekairwa n’ amache, korende  akayiagacha kegima. Engaki eyio, chinyomba nigo chiarenge koagacherwa n' ekebuse. Rituko erimo, omoibi agataka kogenda mw' Ondabu erinde amoibere.

Bono omoibi ngotiichora are engoro

Omoibi oyo akarosia engoro ase enyasi y’ enyomba y’ Ondabu erinde anyorere ase agosoera nyomba ime gose naibe kende. Kagendererete gotiichora engoro, omoibi oyo akagwerwa n’ enyomba eye, na gokwaa abwo abwo.

Emaambia yare kobwatia, omoiri bwori okwerete mw' Ondabu akagenda na goika ase omogambi na komotebia buna omoiri oye nigo agweretwe n’ enyomba y’ Ondabu na gokwa abwo abwo. Bono omoiri oyo agatebia omogambi buna nigo Ondabu abwenerete kong’etwa, akwe.

Omogambi akarangeria Ondabu na komoboria amotebie ekiagerete agatiga enyasi embese, eyio yagerete enyomba ekagwera omonto na komoita agakwa. Ondabu agatebia omogambi buna tarenge na bobe bonde bwensi ekiagera  ayio nigo arabe amagoso yo ori orenge koagacha enyomba yaye.

Bono ogotamera gwasoire

Bono omogambi akaruo, akarangeria ori orenge koagacha enyomba eye na komoboria ribori riria aboreti Ondabu. Omoagachi nere akamotebia buna obobe mbwarenge bwaye, korende nigo bware ase omonto ori oretete amaroba y’ ogochwata enyomba, ayio arenge amabese.

Koigwa iga, omogambi obwango obwo akarangeria omonto ori oretete amaraba y’ ogochwata enyomba. Bono omonto oyo nere ekero aigete ase ekegambero, omogambi akamoboria amaboria aria aboreti aba bande.

Oyo akamotebia buna bobe mbwarenge nere korende nigo bware n’ oyo ore koiya amaraba aya akayabeka enyongo enene, eyio yabwate omonwa omonene. Omogambi akarwo akarangeria omoiyi na komoboria ribori eri are koboria kera omonto.

Keri keri, omoibi agachacka gotichora engoro. Enyomba y' Ondabu aaria Nyamokenye

Onye omorabera antebia buna egasi yane n' engiya, aya onsi tarenge goocha koba

Omoiyi akamotebia buna " Ekero naikaransete nkorosia enyongo, omorabera omuuya agaeta aang’e nainche naende akaanga korora egasi yane engiiya ekagera nkaroisia enyongo eye yabogoreti amaraba y’ ogochwatera enyomba amabese".

Bono omogambi akarwo akarangerioa omorabera oyo na komoboria buna ninki kiagerete agaeta atari korora omoiyo oyo n’ egasi yaye engiiya. Omorabera oyo agatebia omogambi buna nigo aete omorosia amatete, amatente amoroserie erinde ache kobeka igoti korende oyo akaanga komorotera.

Bono nigo arenge koayerera kogenda kogora korwa ase are goonchoreria. Omogambi akarangeria omorosia amatente na komoboria ninki gekogera atebanerete koa omorabera oyo amatente aye. Omorosia amatente tanyora aya are komwegerera erinde atebie omogambi buna ninki kiagerete taa omorabera oyo amatente aye bwango.

Omogambi agateba buna oyo nere ogererete oria akagwerwa  n’ enyomba na gokwa. Igo nigo yare buya omorosia amatente ang’entwe akwe. Omorosia amatente obwango obwo akarengereria na gotebia omogambi buna omoonchoreria ori orenge koba ase ekeoreri ki’ omogambi nairete amamtente aye atamoete naki kiagerete  akanyorwa koa omorabera amatente aye.

Omogambi ekero aigwete aya akayaira koba amaene na  agateba buna omoonchoreria oyo oye, ang’etwe akwe. Ekero omoonchoreria oyo bw’ omogambi agasaine gochandeka n’ ebirengererio buna agocha kong’entwa, abarenge ang’e nere bakarengereria buna bagokonya oyo omwabo.

Obwango obwo, bakanyora eki bagotebia omogambi na komotebia buna tiga omogambi ainyore buna onde  bwensi orang’entwe  engaki buna eye, nigo akogenda igoro ase omotongi oye are, nakoba omogambi ase oroiboro rware kobwatia.

Kai! Bono omogambi tatageti onde bwensi naende abe omogambi. Oyio okwerua kongentwa!

Omonto oyomo akerwa na gotebia omogambi among’ete ekiagera  nere natake abe omogambi ekiagera gakong’entwa nigo akogenda igoro aiborwe naende buya erinde abe omogambi aure omogambi oyo obogambi bwaye. Omogambi agachia koigwa aya agakana pii buna onde taiyo orabe omogambi komobua ase ekenyoro eke!

Igo agataka ang’entwe erinde agenderere koba omogambi aiga engaki yonsi. Aba obwango obwo bakang’enta omogambi oyo na kobeka omonto oyo omong’aini koba omogambi obo.

Welcome to Gusii.com @ Facebook Group