Emegano Y' Abagusii: Bono Kebaki N' Okagonkoru Bakare Gochaka Esegi Entindi !!

Petronillah Ogoti

 

PETRONILLAH OGOTI, Gusii.com: December [ Egesunte, Egesunte Kia Masaba ] 16, 2015.

 

 

 

 

 

 

Aya amwabo aya:

Emegano Ya Mwanyagetinge LXXXVI: Engi Y' Nyangoge, Borabu, Nyamira County, Yakombire Na Komena Kera Egento !!

Emegano Y' Abagusii: Aaria Ase Rinani R' Egetuki, Endo Ekare Goaka Egesima Ime Buna "Timbu !!..."

Emegano " Abagusii XXXVI: Naende Ogasusu N' Omansamu Baetanire!

 

 

Abwo kare kare, Kebaki amo n ' Okagonkoru mbamenyete aaria ase rinani erimo ria Magenche. Bono aba nigo barenge abasani abanene kegima na nigo banchaine ekianda gia ikomi. Kebaki amo n' Okagonkoru nigo barenge koagacha egesera ase oboamo na komenya aamo. Ase boigo, naende aba babere nigo barenge koumerana amo na gotiachora endagera ase oboamo ase chingaki chinyinge.

Bono engaki eyemo, Okagonkoru okare kobora buna "Tiga totare rinani eri rionsi. Nabo toranyore ase agiya kobua aiga ase tomenyete ekiagera naigure gochia moino ye rinani eri endagera n' enyinge na nigo are agiya mono" Aba babere bagaancherana eng'ana eye na komanora gochia korigia enka enyia.

Chinyoni echi chikairuruka na gotambururuka amo erinde barigie enka enyia. Kibakonya koiruruka bakaumera omote omotambe, omuuya ore ne ekiriri ekiiya. Kibanyora omote oyo, bagakung'ia erinde bamenye. Korende chinyoni echi chikaba tichiri koigwana buna gati y' Kebaki amo n' Okagonkoru, buna ning'o orenge gocha korosia egesera aaiga.

Tibakoreti kende nonya, ase engencho y' esegi amo n' ekeminano

Ekero baamererania ase egeka egetambe, eminano n' esegi egaateka. Ekero esegi eye yaateka, omonto akabora okoyetoria. Aba bakaba bakorwana ase engaki entambe, goikera ekairera chinyoni echi koirana gochia ase barwete, batarakora kende !! Korwa erio, aba babere bakamanya ase emioyo yabo ime buna okoigwana n' egento ekiya.

 

Amachara bosa. Bono niingo ogocha koroisia egesera? Esegi teri gokonya onde bwensi. Bono Okagonkoru n' Okebaki bairanire gochia aaria sobo akoro, batarakora kende.  

Bakairaba bosa kabisa batarakora kende

 


Emegano Y' Abagusii: Aaria Ase Rinani R' Egetuki, Endo Ekare Goaka Egesima Ime Buna "Timbu !!..."

Buna Twakabeire Na Petronillah Ogoti. Mwanyagetinge.com Proverbs, Culture And Customs Editor. Riete [ August ] 18, 2015

 

 

Aya amwabo aya:

Emegano Ya Mwanyagetinge LXXXVI: Engi Y' Nyangoge, Borabu, Nyamira County, Yakombire Na Komena Kera Egento !!

Emegano Ya Abagusii XV: "Nigo Iso Ateba, Oire Omogeni Nka, Nyoko Amonyenyere Etwani Eria Enene" Ogasusu

Emegano Ya Abagusii: "Yaa Moisia One, Totakori Ebi Ebike Twanyorire? Ng'ai Twabiroche?" Okarongo

 

 

 

Petronillah Ogoti

Petronillah Ogoti, Gusii.com

 

Abwo kare kare, rinani rinene ndiarenge aroro aaria Egetuki, Bomachoge. Bono rinani eri nigo riarenge ne ching’iti ao ao. Aaiga ase rinani eri, Endo nero yachitenenerete chingiti echi. Bono buna Endo yarenge omoruoti, nigo yaoboire kerage ne ching’iti chionsi chiarenge ime y' rinani eri.

Engaki eyemo, egiateko gie enchara gekaba, n' endagera ekabora. Ching’iti echi nigo chiare n’ enchara enene, n’ amache konyora akamokire. Nigo ching’iti echi chiarenge gotara aare erinde konyora endagera n’ amache erinde tichikwa.Ki rinani riakaoma, ekairera Endo korangeria ching’iti chionsi gocha egeikaro kiaye. Ching’iti chionsi pi chigaikerana ase egeikaro ki’erouti yabo baganyererete koigwa eki barenge gocha gotebigwa.

Bono Ogasusu nkorigia are obong'aini

Endo egatenena gokwana ekero yaroche buna konyora ching’iti chionsi chiaikeranire ase omosangererekano oye na goteba buna "Korwa rero nigo ntagete kera engiti echiche bwone bene, erinde togambe amang’ana agotokonya”Bono omosangererekano okaera na kera eng’iti ekairana n’obwoba obonge.

Bono ng’iti teiyo yaigorete omonwa gokwana ekiagera nigo obwoba bwabaichorerete. Ching’iti echi chikabwatia amachiko y’ endo na ng’iti ende yonsi yachiete gotarera Endo, tiyare koirana gochia ase ching’iti chiamwabo !!

Obo n' obochinga. Bono ngai omoisia oyo Ogasusu agenda? Endo ekare koaora, enchara kiyamoria.

Bono ngai omoisia oyo Ogasusu are

Engaki y’Ogasusu egaika kogende ase Endo. Ogasusu agatwara obwoba kogenda ase Endo. Ng’ora ng’ora akanya korigia obong’aini buna naki arakore aete omotego oyo bw’ Endo. Omoerio oye, agaika bw’ Endo.

Mong'ainwa tari monene

Bono Ogasusu akanyora Endo eyeganyererete na konye yagechigwe buna naki Ogasusu oyo anyoretwe goika bwoye. Mong’ainwa tari monene, n 'Ogasusu agatebia Endo buna nigo yanyorete Endo yamwabo nchera ekaramotanga. Ko ase engencho are omong’aini, akarora buna Endo eye teri eri ebatenenerete ekagera konyorwa goikerana.

Koigwa iga, Endo ekagechigwa na gotebia ogasusu amoire goikera ase oyo ore gwekora ere are. Ogasusu akagoka kianda gi’ ikomi na koayerera gochia ase egesima  kiare bare n’ Endo eye. Bono kibaika ase egesima eke, Ogasusu agatebia Endo esiomerie korwa ase egesieri ki’ egesima erinde  arore Endo eyio yamwabo ere amache ime.

Endo egochia gosiomeria ekarora ende ende eyebwekaine, ekaigwa obororo. Korora iga, Ogasusu agatebia endo esoe ime emoite. Bono Endo buna ere endiri, tiyamanya buna oyio n’ omorengario oye oraange. Endo egasoa ime buna "Timbu..." na gotwe ekamo abwo abwo.

Ogasusu akairana gochia ase ching’iti chinde, ko chigakumia naki ere akorete akairana ekiagera  ching’iti chiamwabo chiachiete bw' Endo tichiaairanete. Ogasusu akabatebia buna Endo nigo yakwete ko egochia konywa amache ase egesima ime.

Ching’iti chigachenga na gotigara chimenyete n’omorembe.

 

 

 

 


Emegano Ya Abagusii: "Yaa Moisia One, Totakori Ebi Ebike Twanyorire? Ng'ai Twabiroche?" Okarongo

 

Abasani baito ase amatuko aetire, ntwaroche buna Egekoro, Emegano, Emerabaro amo n' chinchera chiaito chionsi ntwe Abagusii chiarenge kogenda aamo. Abaminto aaiga naende, nigo togotegerwa Omobayeno, oyio otebetigwe ase enchera y' Omogano !! Aaiga naende, twarorire buna Emebayeno amo n' Emegano yaito ntwe Mwanyagetinge, yarenge kogenda aamo. Enjoy.

 
Petronillah Ogoti. Mwanyagetinge.com Proverbs, Culture And Customs Editor. Ebwagi [ June ] 12, 2015.

 

 

 

Aya amwabo aya:

Emegano Ya Abagusii LXXXIV: Korwa Aaria Gesure, Bobasi In Kisii County, Ebi Nabio Ebikone B' Nyamware !!

Emegano Y' Mwanyagetinge: Bono Omomura Nyandamwamu Agataara igo, Goikera Akarosa Na Korara Nchera !!

Emegano Ya Abagusii V: Ogasusu Oitire Abana Bo Oganchogu!

 

Abwo kare kare, Omotwari oyomo okare koimoka emaambia eyemo gochia gotwara aaria ase rinani ria Mosocho. Buna aigete rinani ime iga, Omotwari oyo akarora Ogachure ogonsensera mbarabare na akaimokia ensara yaye na gotonga Ogachure oyo. Ogachure oyo agaaka inse buna "mo" agakwa.

Korora iga, Omotwari oyo agakabeka ireko na gochaka kogenda kwagachia. Kare nchera ime ye rinani eri, omotwari oyo akaumera Okangubo ogakare gwesigori. Bono Omotwari oyo akagoka mono kegima ekiagera nigo atagete gotwara Okangubo oyo.

Obogworu n' obobe. Tata Omotwari oyo, taraisaneka

Bono Omotwari oyo agaikia Ogachure oyo abwate korwa ireko na gokabeka inse. Korwa abwo, akabeka ensara koboko erinde anyare goita Okangubo oyo. Nonya nabo igo, Okangubo oyo agatwara obosongo botari boke na goaka omotwari oyo orotacho ekero ensara yamobetete.

Ekero aakwa orotacho, Omotwari agaaka inse, agakwa.

Aaiga, nario n' Okangubo nere gakabetwa ensara, agachachana na goiteka amanyinga amange n' omoerio oye nero agaaka inse na gokwera abwo abwo. Bono buna aya agendererete, Okangiti nyarogenda inse nere nao arenge goeta korende tatwara egesio ekiagera Okangubo oyo nigo amotachete nse, nere agakwera abwo abwo.

Kere Koboko, Kere Monu Aare !!

Keri keri, Bono Okarongo nigo arenge mbarabare gasonchete aya onsi pi buna arenge gokorekana. Okarongo nabo aroche buna Ogachure aitetwe, amo n' Omotwari buna akwete, amo na buna n' Okangubo nere aagete inse agakwa gatachete Okangiti nyarogenda inse.

Okarongo akarora aya onsi nigo are ebisio gochia ase are ekiagera nigo are gocha koragera ase engaki entambe atari gochia korigia endagera aare na Mosocho. Bono Okarongo akabwata eng'iti eyemo nyuma y' eyende gochia ase engoro mwaye na kogacha enyama ya kera eng'iti eye na gotebia omosia oye buna "Totakoraria ebi yaa, ng'ai twabiroche?"

Korwa abo, Okarongo akaba n' omoyega bw' endagera ase engaki entambe na koenekia buna n' ekeene abakoro batebete ase omobayeno ori ogoteba buna Kere Koboko, Kere Monu Aare"

Okarongo nkorageria are akamoisia kaye.   "Yaa totakorasenyenta ebi bike? Ngai twabiroche?" 

 

Tiga tosenyente endagera


Emegano Y' Mwanyagetinge: Bono Omomura Nyandamwamu Agataara igo, Goikera Akarosa Na Korara Nchera !!

  
Na Petronillah Ogoti. Mwanyagetinge.com Proverbs, Culture And Customs Editor. Amaumuntia [ May ] 04, 2015.

 

Aya amwabo aya:

Emegano Y' Abagusii XCII: "Goika Orende Bokongu Egekogera Omotienyi Ogeechigwe" Ogasusu Okare Gotebia Oganchogu

Emegano Y' Abagusii LXV: Bono Korora Okambori, Okabwe Agaaka Ekerundo Na Gotwekera Rinani Ime!

Emegano Y Abagusii XXI: Omoibi Egiata, Aaria Iruma.

 

 

Omogaka Nyamonyo narenge aroro. Bono Nyamonyo nigo anywomete omongina Kerebi. Aba babere bakanyora abana chibarongo abamura, abwo barenge korokwa Barongo amo na Birasi. Nonya nabo igo, abaibori aba nigo batare konyara komanyereria ebarongo eyemo korwa ase eyende.

Bono Birasi ere nigo abawate abasani erwenyi engima !!

Ko buna barenge konya gokiina, ching'encho chi'abana aba chikaba tichibwekaini nonya n'asinini. Barongo nigo arenge omokiriru na tabwate basani. Korende Birasi nigo abwate abasani ekenyoro ekegima !!

Barongo nigo anchaine na ng'ina ekianda gia ikomi. Nere Birasi nigo arenge omwanchi ise. Aba bagakina goikera engaki ise atagete kobabagera eng'eria yaye. Ekero okobagana gwaaika, Birasi akaba n' endamwamu, tataka baegwe eng'eria ereng'aine. Birasi agateba buna oyo ore bwe chinguru ne chisemi chinyinge aegwe eng'eria enyinge kobua oyomwabo.

Endamwamu nembe, na bong'aini tibongana nguru. Bono ekero Birasi agocha gotaboboka na kobooka, konyora bwamokiereire nchera. Ebicha na Petronillah Ogoti, Gusii.com/2015

Emaambia yaye, Birasi okare koayerera gochi nka

Koigwa iga, ise agaancherana n' amang'ana a Birasi. Bono ise agatebia abamura aba buna nigo ere buya batare obwoare botari boke gochakera emaambia echuni, ko bairane risase ritararimera. Ise akabatebia oyo ore gocha gotara ase atambe na koirana nyuma ye risase korimera, nere ore gocha konyora eng'eria enene.

Rituko riare kobwatia, chibarongo echi chikamanora n' orogendo erinde bache gwaterwa eng'eria yabo na ise. Barongo nigo arenge gotara ng'ora ng'ora, korende Birasi ere agachaka korundoka n' ebirundo bia igoro mono.

Kai tata !! Bono omomura nyandamwamu nkorosa are, na gwetora nchera

Ekero chiabete mogaso gati gati, ekaba buna ase konye baikire baise koirana nigo baraike sobo risase ritararimera. Barongo agacha koirana gochia sobo korende Birasi akagenderera gotara gochia motwe kwagachia. Barongo akagasana koirana gochia sobo na egesio ekiiya agaikerana chinsa chiri barierete eira.

Nonya nabo igo, Birasi ere agatara igo, goikera akarara nchera !!

Bono Barongo akaegwa eng'eria enene na Birasi n' endamwamu yaye, akaegwa eng'eria ensiniini. Mwanyagetinge ominto, endamwamu n'embe. Tiga twensi tobe n'omoyo bw'obwanchani.


Emegano Y' Abagusii XCII: "Goika Orende Bokongu Egekogera Omotienyi Ogeechigwe" Ogasusu Okare Gotebia Oganchogu

  
Buna Twakabeire Na Petronillah Ogoti. Mwanyagetinge.com Proverbs, Culture And Customs Editor. Engatiato [ January ] 28, 2015

 

Aya amwabo aya:

Emegano Ya Mwanyagetinge LXXXVI: Engi Y' Nyangoge, Borabu, Nyamira County, Yakombire Na Komena Kera Egento !!

Emegano Ya Abagusii LXXXIV: Korwa Aaria Gesure, Bobasi In Kisii County, Ebi Nabio Ebikone B' Nyamware !!

Emegano Y' Abagusii: Bono Ogasusu Otaameire Buna Onyorire Orogendo Gochia Mache Ng'umbu !! 

 

Aaria ase rinani ria Nyangweta, chinchogu nchiamenyete aroro. Chinchogu echi nigo chiarenge chinyinge ekerage, naende nigo chiamenyete aiga ase rinani eri ime ase emiaka etari meke. Bono engaki eyemo, omorakera okarora se, amache akabora amo n'endagera ekaba botu boke.

Chinchogu echi chikaba n' obwoba obonge ekiagera egiateko eke nigo kiare ekenene, n' amache akaba taiyo nonya n' amasinini. Gati y' chinchogu echi, Oganchogu oyomo narengeo ochitenerete buna omoruoti obo. Bono omoruoti oyo nigo aitete ebirengererio, goikera akaigwa ase oroche oromo rwarenge, orwo konyora rotarakamoka.

Aiga nao chinchogu chiarenge gochia erinde chianywa amache ekiagera erang'o nigo yachitete, eyio ere  enene. Chinchogu echi chikaba chigotara gochia ekeng'umbu ekio karenge egeka gochia konywa amache. Aaiga ekeng'umbu eke, ebisusu mbiamenyete mbarabare na nigo ebisusu ebi biarenge ebinge mono.

Omotienyi ogeechigwe na konyegeria amache !!

Chinchogu chikare konywa amache

Bono chinchogu ko chianyure amache, nigo chiarenge gotindacha ebisusu ebi nchera koagachia, ekagera ebisusu ebinge gosiria obogima bwabo. Ebisusu ebi bigatwara obwoba obonge, na korora buna nigo kaa chinchogu echi chirabakire pi. Bono ebisusus ebi bigacha aamo na gochaka korigia enchera erabikonye gose eragere chinchogu echi chiire magoro make.

Gati ye ebisusu ebi, Ogasusu narengeo omosiniini kobua ebinde, korende nigo arenge omong'aini mono ase chisemi. Ogasusu oyo agatebia ebisusu biamwabo buna nigo are kogenda atenene ase ekegoro kiare aganye chinchogu echi ekero chimanorete gochia konywa amache erinde achikwanere.

Bono ebisusu biamwabo kibiagwa aya bigaancherana na gotoma oyo omwabo agende arore gose nabakonye. Ogasusu akamanora goikera ase ekegoro kiare na koganya chinchogu echi engaki chigochia konywa amache erinde akwane buna aroberetie.

Bono Omotienyi Ogeechigwe

Keri keri chinchogu chigasoka, chigotacha n' amatiratiri amakong'u. Aaiga nario Ogasusu achagete gotebia chinchogu echi gichigoeta okobora buna "Abaminto gaki nimbanchete. Tiga mbaibere eng'ana naigure etagete kobagwera bobe. Omotienyi nkoumana okare buna nigo mogochia oroche rwaye goaka ontimbu na konywa amache aye nyuma yaye mwamanya gotacha na goita ebisusu. Bono Omotienyi ogeechigwe bororo kegima"

Oganchogu ori otenenerete echiamwabo akaondoka korende akaayerera na gosoa roche. Ko buna asoete roche ime iga, akarora omorengari bw' omotienyi roche. Buna Oganchogu agasaine gosera, amache agasuka.

Aaiga nari Ogasusu amotebeti arende bokong'u ekiagera Omotienyi ogechigwe goikeraka onyegeiri amache aya are roche. Chinchogu echi chikarora buna obo n' obomaene obonene. Bono chinchogu echi chikare gotama koagachia korwa ase oroche oru. Tichichieti koiranera naende konywa amache aya.

Ebisusu bigatigara bimenyete n'omorembe.